SMnewstl.com DÍLI 10 Augosto 2026- Setór edukasaun Timor-Leste kontinua fó atensaun boot ba promosaun Edukasaun ba Paz, liuhosi kooperasaun ho Heavenly Culture, World Peace, Restoration of Light (HWPL), ho objetivu atu hametin kultura dame, koezáun sosial no valor étiku entre gerasaun foun.
Kooperasaun ne’e hahú iha Maiu 2023, liuhosi atividade 525 Peace Walk iha Dili, ne’ebé Ministru Edukasaun partisipa hanesan oradór prinsipál. Atividade ne’e halibur sidadaun no estudante sira atu promove mensajen kona-ba dame, unidade no koezisténsia.
Hafoin haree impaktu husi atividade ne’e, Ministériu Edukasaun hahú konsidera edukasaun ba dame la’ós de’it hanesan eventu pontuál, maibé hanesan parte importante husi esforsu atu dezenvolve gerasaun foun ne’ebé iha kapasidade atu rezolve konflitu liuhosi diálogu no koezisténsia pasífika.
Iha Setembru 2023, Ministru Ensino Superior, Siénsia no Kultura, José Honório da Costa Pereira, hamutuk ho lideransa universidade sira, partisipa iha 9.º HWPL World Peace Summit. Partisipasaun ne’e fó oportunidade atu haree esperiénsia internasionál kona-ba implementasaun programa edukasaun ba dame.
Hafoin enkontru ne’e, Ministériu hahú fó orientasaun administrativa ba universidade sira atu konsidera implementasaun Peace Educator Training no realiza sesaun informasaun kona-ba edukasaun ba dame.
Kooperasaun ne’e sai formal liután bainhira, iha 16 Jullu 2024, HWPL no Ministériu Ensino Superior, Siénsia no Kultura asina Memorandum of Agreement (MOA) atu institucionaliza kooperasaun iha área edukasaun superior.
Enkuantu iha 28 Agostu 2025, HWPL asina Memorandum of Understanding (MOU) ho Ministériu Edukasaun atu habelar kooperasaun ba nivel edukasaun primária, sekundária no edukasaun públika jerál.
Ho akordu sira ne’e, edukasaun ba dame hahú habelar husi nivel edukasaun superior ba sistema edukasaun nasional ho abordagem ne’ebé liu institusional.
Depois de liu 25 fulan kooperasaun, iniciativa ne’e kontinua buka hametin valor dame, toleránsia, respeitu, diálogu no koezisténsia entre estudante sira no komunidade edukasaun.
Ba Timor-Leste, esforsu atu integra edukasaun ba dame iha sistema nasional konsidera hanesan investimentu ba gerasaun futuru, atu garante katak dame no estabilidade sai parte husi kultura no dezenvolvimentu nasional.(SMNEWs)
Komentariu