| Manatuto, 13 Maiu 2026 — Udan ho intensidade bo’ot ne’ebé kontinua durante semana ida ne’e afeta infraestrutura públiku balu iha Munisípiu Manatuto, liuliu iha Suku Maneha’at, Postu Administrativu Natarbora.
Estrada nasional ne’ebé liga Munisípiu Manatuto ho Postu Administrativu Natarbora no mos asesu ba Munisípiu Viqueque no Manufahi, dadaun kotu total tanba erosaun no rai-halai ne’ebé akontese iha area refere.
Informasaun husi komunidade lokal hatete katak kondisaun ne’e halo transporte no movimentasaun komunidade labele asesu ba mai no ba, tanba parte balu hosi estrada hetan estragus ho kategoria grave.Dezastre naturál ne’e mos halo preocupasaun boot ba komunidade tanba estrada refere importante tebes ba atividade ekonomia, transporte públiku no asesu ba servisu báziku sira.
Ho situasaun ne’e, komunidade husu ba ministériu relevante no autoridade kompetente sira atu halo intervensaun lalais hodi hadi’a infraestrutura ne’ebé afetadu no prevene risku seluk durante tempu udan ne’e. Komunidade mos husu ba viajante no kondutor sira atu nafatin kuidadu no atento bainhira halo viagem durante kondisaun tempu udan.*(/Smnews)
Komentariu