SMNews.com | Dili, 12 Maio 2026 — Sidadaun ida ne’ebé kondús motorizada suspeita soke traballador raut foer ida iha área Dili laran, hafoin tenta halai husi fatin akontesimentu nian.
Tuir vídeo ne’ebé SMNews asesu, iha momentu ne’ebá funsionáriu limpeza sira raut hela foer no tula ba kareta. Iha tempu ne’ebá, motorizada ida mai derepente no soke direta ba funsionáriu ida hodi rezulta kanek iha ain antes fila motor hodi halai liu.
Maske iha funsionáriu rua seluk tenta dada no husu atu motorizada ne’e responsabiliza ba nia asaun, maibé suspeitu la para no kontinua halai husi fatin refere.
Insidente ne’e provoka indignasaun husi ema barak liu-liu komunidade no autoridade munisipal sira, tamba konsidera asaun ne’e hanesan la iha respeitu ba traballador limpeza sira ne’ebé servisu lor-oloron atu mantém sidade naroman no moos.
Prezidente Autoridade Munisípiu Dili, Francisco dos Santos, mos hasai reasaun maka’as liu husi nia pájina ofisiál Facebook ne’ebé SMNews asesu.
Lian ne’ebé nia hato’o mak: “Kuitado hau nia alin sira ne’e raut hela foer, o bele mai soke deit depois o halai tan. O keta mehi atu halai lakon karik.”
To’o agora autoridade kompetente seidauk fó sai identidade kondutor ne’ebé envolve iha kazu ne’e, no komunidade hein katak parte responsavel tenke lori responsabilidade tuir lei atu prevene akontesimentu hanesan ne’e la repete tan iha futuru.(SMnewstl/)
Komentariu