. | 11 Maio 2026 — Xefe Estadu Maiór Jenerál Forsa Armada (XEMGFA), Tenente Jenerál Domingos Raul “Falur Rate Laek”, revela katak lider históriku na’in lima hala’o enkontru importante ida iha Farol hodi ko’alia kona-ba interese no unidade nasaun nian, liuliu preparasaun ba serimónia loron 20 Agustu tinan ida ne’e.
Lider sira ne’ebé partisipa iha enkontru refere mak Taur Matan Ruak, Francisco Guterres “Lú Olo”, Lere Anan Timur, Filomeno Paixão de Jesus no Falur Rate Laek rasik.
Tuír Falur, enkontru ne’e importante tebes tanba lider sira hotu-hotu mak eis titular no balun mos membru Konsellu Superiór Defeza Militar, ne’ebé iha responsabilidade atu fó hanoin no orientasaun kona-ba konseitu serimónia FALINTIL nian ba loron 20 Agustu.
“Ha’u mai hasoru sira tanba sira eis titulares. Ha’u husu sira nia opiniaun no hanoin laran atu depois bele halo konseitu ida ba 20 Agustu tinan ida ne’e,” hatete Falur.
Nia esplika katak konseitu serimónia tinan ida ne’e sei diferente ho tinan sira uluk, liuliu iha forma pratika no maneira organizasaun nian.
“Diferensia maka uluk ha’u la mai hasoru sira hanesan agora. Ami uluk toba hamutuk, han hamutuk no luta hamutuk iha ai laran. Agora ami fahe malu ona tanba família, poder no politika. Maibé agora ami halibur malu fali ba interese nasaun nian,” dehan nia.
Falur mos afirma katak hanoin no kontribuisaun husi lider sira sei sai baze importante ida atu nia bele prepara relatóriu ofisiál ba Governu kona-ba serimónia boot FALINTIL nian iha tinan ida ne’e.(SMnewstl/)
Komentariu