Smnews.com | Díli, 10 Maiu 2026 – Primeiru-Ministru Timor-Leste, Kay Rala Xanana Gusmão, hateten katak negosiasaun terceira ronda entre Timor-Leste no Indonézia kona-ba fronteira marítima ne’ebé realiza tiha iha Jogjakarta, Indonézia, seidauk to’o ba solusaun final ba área hotu-hotu.
PM Xanana esplika katak prosesu negosiasaun internasionál la’ós buat ida ne’ebé bele resolve lalais, tanba tenke tuir regras no lei internasionál sira ne’ebé regula delimitasaun fronteira tasi entre nasaun rua.
“Ita la bele dehan katak problema hotu resolve ona. Negosiasaun ida-ne’e presiza tempu no tenke tuir lei internasionál sira,” dehan PM Xanana ba jornalista sira iha Salaun VIP Aeroportu.
Maski nune’e, PM Xanana revela katak parte rua konsege ona hetan entendimentu inisiál kona-ba delimitasaun fronteira husi Batugadé liuhusi Atauro to’o Munisípiu Lautém.
Nia mos confirma katak delegasaun Timor-Leste no Indonézia sei kontinua hala’o negosiasaun da-4 iha fulan Agostu tinan ida-ne’e iha Bali, Indonézia, ho foku ba área estratéjika sira hanesan Oekusi, parte Lautém to’o Jaco no área tasi iha Suai.
“Espera katak prosesu ida-ne’e bele lao ho di’ak no fó benefísiu ba nasaun rua,” hateten tan PM Xanana.
Antes ne’e, Timor-Leste no Indonézia hala’o terceira ronda negosiasaun fronteira marítima durante loron tolu, 27 to’o 29 Abríl 2026, iha Singapura.
Durante enkontru ne’e, delegasaun rua konsidera atmosfera negosiasaun lao ho di’ak no konstrutivu, ho kompromisu atu kontinua buka solusaun ba fronteira tasi ne’ebé seidauk defini definitivamentu.(SMnewstl/)
Komentariu