Smnewstl.com | Dili, 11 Maio 2026 – Polísia Nasional Timor-Leste (PNTL) afirma katak sei la tolera ema ne’ebé envolve iha kazu violénsia ne’ebé akontese iha festa kazamentu ida iha Hera Akanunu, Munisípiu Díli.
Asaun brutal ne’e halo komunidade sira paniku no dadaun investigasaun sei lao nafatin hodi buka tuir suspeitu sira seluk.
Komandante PNTL Munisípiu Díli, Komisáriu Asistente Polísia Orlando Gomes, haktuir katak kazu ne’ebé akontese iha loron 9 fulan Maiu 2026 iha Hera Akanunu konsege mobiliza forsa polísia atu halo operasaun imediata.
Tuir nia hateten, durante operasaun refere, polísia konsege kaptura suspeitu hamutuk nain 12 ne’ebé suspeita envolve iha asaun violénsia ne’e.
Komisáriu Orlando Gomes subliña katak asaun brutal ne’ebé mosu durante festa kazamentu ne’e halo situasaun segurança komunidade sai nakonu ho ta’uk no paniku.
Tan ne’e, PNTL sei kontinua halo investigasaun rigorozu no la tolera ema ne’ebé tenta perturba ordem públika.
Enkuantu ne’e, vitima balun hato’o ona keixa formal ba autoridade sira, no vitima seluk sei prepara hela dokumentus atu hato’o tan keixa relasiona ho estragus no violénsia ne’ebé akontese iha festa kazamentu refere.
Dadaun ne’e, suspeitu 12 ne’ebé detein hela ona durante oras 72, sei apresenta ba Ministériu Públiku hodi hala’o primeiru interogatóriu no prosesu legal tuir lei vigente.(SMnewstl/)
Komentariu