Smnewst.com | Díli, 07 Maiu 2026 – Komisaun Nasionál Aprovisionamentu (CNA) oficialmente fó sai notifíkasaun adjudikasaun ba projetu reabilitasaun estrada munisipál Bobonaro-Lolotoe, ne’ebé sei implementa husi kompania Xineza Jiangsu Ruiwo Construction Group Co., Ltd., ho valor kontratu besik USD 12 millaun.
Bazeia ba dokumentu “Notification of Award” no “Notificação de Adjudicação” ne’ebé SMNews asesu, loron 30 Abril 2026, projetu ne’e rejista ho númeru tender TENDER/106/MOP-2025 no envolve reabilitasaun estrada troçu A-16 husi Bobonaro ba Vila Lolotoe ho distánsia kilometrus 8.9, hahu husi segmentu 0+000 to’o 8+900.
Valor total kontratu ba obra ida ne’e atinji USD 11,979,891.30 inklui impostu hotu ne’ebé aplika. Projetu sei implementa liuhusi Ministériu Obras Públikas ho objetivu atu hadi’a infraestrutura transporte no fasilita asesu komunidade iha área Bobonaro no Lolotoe.
Estrada Bobonaro-Lolotoe konsidera importante tebes ba atividade ekonomia no mobilidade povu, liuliu komunidade sira ne’ebé depende ba transporte terrestre atu lori produtu agríkola ba merkadu no asesu ba servisu públiku hanesan saúde no edukasaun.
Governu hein katak implementasaun projetu ne’e bele hadi’a kondisaun estrada, hamenus tempu viajen no aumenta seguransa ba utilizadór estrada sira.
Dokumentu adjudikasaun ne’e mos refere katak prosesu tender hala’o tuir Dekretu-Lei númeru 22/2022, loron 11 Maiu, kona-ba regras aprovisionamentu públiku iha Timor-Leste. (/SMnews)
Komentariu