Smnewstl.com | Tulataqueo, Remexio 02 Marsu 2026 – Komunidade iha Suku Tulataqueo hatudu espirítu unidade no kooperasaun liu husi atividade preparasaun atu simu visita Nai Kruz Joven ne’ebé planeia realiza iha loron 06 Maiu 2026.
Komisaun Organizadora (KO) hahú ona visita ba Nai Kruz Joven iha área suku nian, ho objetivu atu halibur sasan husi aldeia no bairro sira.
Aldeia sira ne’ebé partisipa ativa iha kontribuisaun sasan mak Aikurus, Dacilelo, Roluli no Samalete. Sasan sira ne’e hotu-hotu konsentra hamutuk iha uma laku Maria do Carmo, iha Aldeia Samalete.
Iha oportunidade ne’e, komunidade hotu-hotu tau forsa hamutuk hodi garante preparasaun ne’e lao ho di’ak no organiza, hodi simu visita ne’ebé konsidera importante ba vida espiritual no sosial iha suku ne’e.
KO mós hato’o mensajen importante ba povu Tulataqueo, atu kontinua hametin unidade no solidariedade entre ema hotu, tanba ho unidade deit mak bele halo eventu boot ida ne’e susesu.
Ho lema inspiradór: “Tulataqueo hau nian, o nian no ita hotu nian”, komunidade hatudu katak responsabilidade no orgulho ba suku ne’e pertense ba ema hotu, no presiza hadia no proteje hamutuk.
Preparasaun sei kontinua to’o loron realizasaun, ho esperansa katak visita Nai Kruz Joven sei lori bençaun no fó forsa foun ba komunidade iha Suku Tulataqueo.(/SMnews)
Komentariu