SMnewstl.com Liquiça, 27 Abril 2026 – Udan boot iha segunda-feira (27/4) hamosu mota boot iha area Aldeia Kamalehohoru, Suku Dato, Postu Administrativu Liquiça, ne’ebé prejudika tebes movimentasaun transporte públiku no privada iha estrada ligasaun Dili–Maliana no Maliana–Dili.
Tuir informasaun ne’ebé SMnewstimor hetan liu husi entrevista WhatsApp ho sidadaun Luisinho da Silva Soares, hatete udan, ne’ebé hahú iha tuku 4:00 lokraik ho intensidade bo’ot husi parte foho, hamosu mota bo’ot no be sae lalais no taka dalan públiku. Kondisaun ne’e halo transporte no ema ne’ebé lao ain hasoru difikuldade boot atu atravessa.
Luisinho hateten katak, além de prejudika transporte, mota refere mós fó ameasa ba komunidade sira ne’ebé hela besik iha mota ninin. Situação ne’e mós halo difikuldade ba labarik estudante sira ne’ebé ba no mai eskola iha área Mauboke.
“Mota ne’e prejudika tebes iha tempu udan, tamba taka dalan públiku no halo ema susar atu asesu. Ami husu ba governu atu konstrui ponte ho urjénsia,” dehan Luisinho.
Komunidade husu atu governu, liuliu Ministériu Obras Públikas, fó atensaun imediata hodi konstrui ponte permanente atu evita problema hanesan iha futuru, no asegura seguransa ba utilizador estrada sira. (/SMnews)
Komentariu