SMnewstl.com DILI 27 Abril 2026 – Ministeriu Obras Públika (MOP) ofisialmente asina kontratu ba pakote 31 estrada rural iha munisípiu lima, hanesan Ainaro, Aileu, Baucau, Bobonaro no Covalima, ho objetivu atu hadi’a asesu komunidade no impulsiona ekonomia lokal.
Minstro obras Samuel Marçal, Hatete Projetu ida ne’e importante tebes tamba sei fasilita transporte ba povu iha área rural, hadia koneksaun entre suku no aldeia, no ajuda movimenta produtu agríkola ba merkadu ho fasil liu.
Tuir Ministro katak, Inisiativa ne’e mós sei kontribui ba asesu servisu báziku hanesan edukasaun no saúde, no hamenus izolamentu komunidade iha área remota sira.
Ministru Obras Públika, Samuel Marçal, hateten katak asina kontratu ida ne’e atu aselera dezenvolvimentu estrada rural tuir orientasaun Governu ne’ebé tau prioridade aas ba infraestrutura iha área rural.
MOP dehan , durante tinan ida ne’e, Governu iha planu atu implementa pakote 39 estrada rural iha rai laran tomak.
“Foin dadaun ita asina pakote estrada nasional no municipal, no ohin ita asina tan pakote 31 atu ajuda povu sira iha área rural,” dehan Ministru Samuel Marçal ba jornalista sira.
Projetu ne’e inklui konstrusaun no reabilitasaun estrada ho padraun tékniku ne’ebé di’ak, atu garante durabilidade no seguransa ba utilizadór sira.
Governu mós asegura katak implementasaun sei hala’o ho supervizaun rigorozu hodi garante kualidade servisu no transparénsia iha uza orsamentu públiku.
Total orsamentu ba projetu ne’e $15 miliaun dolar amerika, ho durasaun implementasaun durante tinan ida. Orsamentu ne’e sei distribui tuir kapasidade kompania sira ne’ebé manan tender.
Maski nune’e, MOP rekuiñese katak iha dezafiu hanesan udan boot iha munisípiu balu, ne’ebé bele afeta prosesu implementasaun, maibé sei konsidera situasaun hirak ne’e iha planeamentu.
Ministru Samuel Marçal husu ba kompania hotu atu implementa projetu tuir prazu ne’ebé determina ona, atu garante benefísiu lalais ba komunidade rural sira no suporta kresimentu ekonomia iha Timor-Leste. (/SMnews)
Komentariu