SMnewstl.com | DÍLI, 22 Abril 2026 – Azénsia Dezenvolvimentu Nasionál, I.P (ADN), hamutuk ho Ministériu Turizmu no Ambiente (MTA), konbina papel estratéjiku iha diskusaun téknika importante ida kona-ba konstrusaun Jardim Frente Marítima, ne’ebé sei liga área Motael to’o Praia dos Coqueiros.
Enkontru ne’e organiza husi MTA ho objetivu atu asegura katak projetu ne’e implementa ho kualidade aas, sustentabilidade ambientál, no padraun tékniku ne’ebé rigorozu.
Iha diskusaun ne’e, ADN ho parseiru tékniku sira halo análize detallu kona-ba planu dezenvolvimentu, inklui dezenhu infraestruturál, avaliasaun impaktu ambientál, no padraun tékniku sira ne’ebé presiza tuir iha faze implementasaun.
Partisipasaun ADN konsidera hanesan etapa krusiál ida atu garante katak projetu ida-ne’e la’ós de’it hadi’a beleza urbana Dili nian, maibé mos fó prioridade ba sustentabilidade no reziliénsia ambientál iha tempu naruk.
Diretór Jerál Turizmu, António da Silva, hatete katak projetu Jardim Frente Marítima sei transforma área tasi-ibun Dili nian sai espasu rekreasaun públiku modernu no atraksaun turístika foun.
“Enkontru ohin fó foku liu ba aspétu tékniku, inklui preparasaun dadus importante sira molok entrega ba empreza husi Xina ne’ebé sei ezekuta projetu ne’e,” esplika António da Silva iha CCD.
Diskusaun ne’e mos enfatiza koordenasaun entre instituisaun relevante sira atu prevene atrasu no asegura implementasaun lao tuir planu.
Projetu ne’e bazeia ba akordu ne’ebé asina iha 19 Dezembru 2025 entre Governu Timor-Leste, liuhusi Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, ho Governu Repúblika Populár Xina.
Projetu Renovasaun Terraplén Kosteira ne’e sei habelar husi Motael to’o Praia dos Coqueiros, ho objetivu atu:
- Proteje tasi-ibun hosi erozaun
- Hasa’e reziliénsia ba mudansa klimátika
- Hadi’a dezenvolvimentu urbanu sustentável
Enkontru tékniku ne’e konta ho partisipasaun husi instituisaun importante sira, inklui: Ministériu Obras Públikas, Ministériu Justisa, EDTL, ADN, no Bee Timor-Leste, E.P.
Komentariu