SMnewstl.com | MALIANA| 18 Abril 2026-Diretor Ezekutivu Ajénsia Dezenvolvimentu Nasionál (ADN, I.P.), Januario Maia Guterres, afirma katak projetu estrada foun iha Bobonaro Municipality, liu-liu iha área urbana Maliana, konsege finaliza tuir padraun tékniku no kualidade ne’ebé estabelese ona.

Diretor Ezekutivu refere esplika katak ADN nia papel prinsipál mak envolve monitorizasaun, fiskalizasaun no inspesaun iha teren, atu garante katak servisu konstrusaun sira hala’o tuir kontratu no norma téknika ne’ebé aplika.

ADVERTISEMENT
SCROLL FILA BA NOTISIA


Nia subliña katak projetu Pakote Rua iha Maliana ne’e, hafoin governu foun simu posse, Ministério Obras Públicas, Transportes e Comunicações hamutuk ho ADN realiza re-verifikasaun ba kustu projetu, antes atu kontinua implementasaun iha tinan 2024.

Lee Mós:
Posibilidade Deklara Kandidatura Iha Dili, Horta Sei Halo Reflexaun Durante Oras 48

“Hanesan ita hotu hatene, projetu Pakote Rua ne’e hetan supervizaun husi konsultor independente, maibé ADN nia papel importante mak asegura kualidade.

Tanba ne’e, tekniku ADN no Ministério das Obras Públicas, Transportes e Comunicações sempre halo monitorizasaun no ekipa laboratóriu sira realiza teste ba material konstrusaun atu garante estrada ne’e iha kualidade di’ak,” hateten Januario Maia Guterres hafoin inaugurasaun estrada urbana Maliana.

Nia mós hato’o agradecementu ba kompanhia implementadora sira ne’ebé konsege finaliza projetu tuir tempu ne’ebé determina ona.

Lee Mós:
Prezidente Ramos-Horta Hato’o Sentidu Kondolénsia ba Maktoban Avó Maria Simão.

Ministru Obras Públicas, Samuel Marçal, hato’o katak estrada foun ne’e sei iha impaktu pozitivu boot ba komunidade iha Municipio Bobonaro.

“Estrada ne’e sei fasilita movimentu ema no transporte sasán, liu-liu iha Maliana no area sira seluk. Nune’e mós sei kontribui ba hadia ekonomia lokal no aumenta oportunidade servisu ba komunidade,” Ministru Samuel Marçal deklara.

Nia mós subliña katak projetu ne’e la’ós de’it melhora aksesu transporte, maibé sei hadia atividade komersial no impulsiona dezenvolvimentu sustentável iha região.

Lee Mós:
Governo Sei la Nonok ba Kompaña Abandona Projeitu, Sama Atensaun ba Kompañia Segerau

Governu kontinua kompromete atu investe iha infraestrutura hodi asegura kresimentu ekonomia no aumenta qualidade vida sidadaun sira iha Timor-Leste.

Projetu estrada urbana Maliana ne’e ho orsamentu total US$ 33 milhões, inklui US$ 12 milhões ba estrada urbana no US$ 21 milhões ba estrada nasional.

Projetu ne’e kobre distánsia hamutuk 48 km, husi Nunura to’o área sira iha vila laran Maliana.

Implementasaun projetu ne’e responsabiliza husi kompanhia internasionál rua, mak hanesan PT. Hutama Karya (18,847 km) no PT. Bina Mitra Indo Sejahtera (29,505 km). (/SMnews)

 

Lee nain: 30