SMnewstl.com MALIANA || 18 Abril 2026 – Ministru Obras Públikas, Samuel Marçal, lori naran Governo hato’o agradesimentu boot ba komunidade iha Munisípiu Bobonaro, liuliu Postu Administrativu Maliana, tamba koopera diak durante prosesu rehabilitasaun estrada ne’ebé agora konsege remata tuir tempu.
Tuir Ministro MOP katak Durante tinan ida resin, komunidade Maliana hatudu kolaborasaun diak ho kompanhia sira ne’ebé implementa projetu, nune’e obra bele lao diak no remata tuir planu. Inaugurasaun ne’e kobre estrada nasionál no urbana iha Maliana tomak, ne’ebé agora kuaze hotu ona.
“Governu hato’o agradesimentu boot ba komunidade iha Maliana, Munisípiu Bobonaro, tamba durante tinan ida resik sira koopera diak tebes ho kompanhia sira, nune’e projetu estrada ne’e bele remata tuir tempu no ho kualidade diak.”Hatete Ministro MOP Hafoin Entervista ho SMnews iha Maliana Sabado ne’e.
Ministru Samuel Marçal esplika katak projetu estrada Maliana hahú planu iha tinan 2023, maibé tamba presiza halo ajustamentu dezenhu no mudansa tékniku balu, implementasaun foun hahú efetivamente iha tinan 2024.
“Estrada ida ne’e importante tebes ba povu, tamba bele fasilita transporte, promove atividade ekonomia no hasa’e moris diak komunidade. Governu sei kontinua investe iha infraestrutura atu suporta dezenvolvimentu iha rai laran.”subliña Ministro MOP.
Enkuanto Orsamentu total ba projetu ne’e ho total 33 miloens dolares amerikanu, ne’ebé inklui,12 miloens ba estrada urbana no 21 miloens ba estrada nasionál.
Projetu rehabilitasaun estrada urbana Maliana kobre distánsia hamutuk 48 KM, husi Nunura to’o área sira iha vila laran.
Nune’e Implementasaun projeito ne’e responsabiliza husi kompanhia internasionál rua, mak hanesan PT. Hutama Karya ho Tatol Kilomentro (18.847 KM) no PT. Bina Mitra Indo Sejahtera ho total (29.505 KM).
Autoridade Munisípiu Bobonaro afirma katak obra ida ne’e marka istória importante ida ba dezenvolvimentu rejiaun, tamba estrada nu’udar infraestrutura vitál ne’ebé, fasilita transporte no mobilidade,promove atividade ekonomia,kria espasu interasaun sosial iha área urbana.
Prezidente Autoridade Munisípiu Bobonaro, mos subliña katak kualidade obra hatudu katak kompanhia sira la’ós deit servisu tamba osan, maibé mos iha kompromisu no paixão hodi kontribui ba dezenvolvimentu, hanesan parte hosi relasaun diak entre povu no estadu, inklui kooperasaun rejionál hanesan membru ASEAN.
Governu liuhusi autoridade lokal hato’o agradesimentu boot ba IX Governu Konstitusionál tamba kontinua investe iha infraestrutura, liuliu estrada, ne’ebé importante tebes ba dezenvolvimentu ekonomia no bem-estar povu iha Munisípiu Bobonaro. (/SMnews)
Komentariu