Smnewstl.com | Dili, 19 Abril 2026 – Tribunal Judisiál Primeira Instánsia Baucau deside aplika medida koasaun prizaun preventiva ba arguidu nain 32 husi Indonézia, ne’ebé suspeitu forte envolve iha atividade peska ilegal iha área tasi Timor-Leste, ho indikasaun katak sira naok ikan ho tonelada barak.
Julgamentu ba arguidu sira ne’e realiza iha Domingu (19/04/2026), iha Tribunal Judisiál Primeira Instánsia Munisípiu Baucau.
Relasiona ho kazu ne’e, arguidu sira kapturadu iha loron 16 Abril 2026 husi Unidade Patrullamentu Marítima (UPM), liuhusi operasaun iha kosta sul Timor-Leste, entre área Beaço no Uatucarbau.
Kaptura ne’e akontese durante operasaun patrullamentu durante loron lima, uza lancha rápida rua ho apoiu NRTL Lusitania, ho objetivu reforça fiskalizasaun no proteje rekursu marítimu nasional.
Durante operasaun ne’e, ekipamentu UPM deteta ro KM Makmur Rejeki Mulya ne’ebé hala’o atividade peska iha área ne’ebé la iha autorizasaun. Iha inspeksaun, autoridade sira identifika tripulante nain 32 iha bordu.
Autoridade sira mós konfirma katak iha momentu kaptura, sira konfiska ikan ho total aproximadamente 9 tonelada, hamutuk ho rede arastu no ekipamentu peska ilegál seluk.
Hafoin kaptura, arguidu sira no evidénsia hotu entrega ba Komandu Munisípiu Lautém atu kontinua prosesu investigasaun no prosesa legal tuir lei Timor-Leste nian, antes submete ba tribunal kompetente.
Autoridade marítima reafirma katak operasaun fiskalizasaun hanesan ne’e sei kontinua no sei intensifika tan hodi asegura proteksaun ba rekursu naturais no soberania marítima Timor-Leste husi atividade peska ilegál. (/SMnews)
Komentariu