SMnewstl.com BAUCAU|| 18 Abril 2026 – Prezidente da Repúblika José Ramos-Horta ofisialmente lansa fatuk dahuluk ba konstrusaun uma digna ida ba Maria da Costa, ne’ebé durante tinan 10 resin hela iha fatuk kuak iha área Badunau, Aldeia Lulihene, Suku Bucoli, Postu Administrativu Baucau, Munisípiu Baucau.
Serimónia ne’e marka momentu importante ida ba Maria da Costa, ne’ebé durante tempu naruk enfrenta kondisaun moris ne’ebé difísil no la seguru. Iha nia intervensaun, Prezidente hato’o katak governu iha obrigasaun atu tau matan ba sidadaun sira ne’ebé moris iha vulnerabilidade, liu-liu iha área habitasuan, tanba uma digna mak direitu báziku ida ba ema hotu.
Nia mos enfatiza katak inisiativa ida ne’e la’ós de’it ajuda ba família ida, maibé mos parte husi esforsu governu atu hamenus pobreza no hasa’e kualidade moris povu iha rai laran. Projetu ne’e espera bele remata iha tempu badak atu Maria da Costa bele hela iha fatin ne’ebé seguru, saudavel no dignu.
Maria da Costa hatudu nia kontentamentu no emosiona ho apoiu ne’ebé mak simu, dehan katak buat ne’ebé antes hanesan mehi agora sai realidade. Komunidade lokal no autoridade sira mos partisipa iha eventu ne’e, hatudu solidariedade no apoiu ba família ne’e.
Governu reafirma nia komitmentu atu kontinua programa sira hanesan ne’e iha futuru, atu la iha tan sidadaun ne’ebé presiza hela iha kondisaun hanesan Maria da Costa nian durante tinan barak. (/SMnews)
Komentariu