Smnewstl.com DILI, 8 Abril 2026 | China Civil Engineering Construction Corporation (CCECC) hahú ona mobiliza ekipamentu pezadu husi Dili ba Municipio Ermera atu aselera projetu estrada estratéjiku Gleno–Letefoho, ne’ebé sei transforma asesu transporte no impulsiona dezenvolvimentu ekonomiku iha área rurál.
Kompañia refere lori makina pezadu hanesan eskavadora, bulldozer no kamiaun sira atu hahú servisu konstrusaun no reabilitasaun estrada, ho objetivu atu fasilita mobilidade komunidade no hasa’e ligasaun entre Gleno no Letefoho.
Projetu ida ne’e mak kontinuidade husi lansamentu ofisiál ne’ebé hala’o hosi Kay Rala Xanana Gusmão iha 26 Janeiru 2026 iha Eranulu, hanesan parte husi estratéjia Governu atu moderniza infraestrutura iha rai-laran.
Ho valór kontratu boot to’o USD $38.8 miliaun, Governu fó responsabilidade ba CCECC atu implementa projetu ne’e ho kobre estrada hamutuk kilómetru 84, 30 km iha Letefoho no 54 km iha Gleno, ho prazu servisu tinan ida fulan walu.
Projetu estrada Gleno–Letefoho konsidera nu’udar etapa importante ida atu loke oportunidade foun ba ekonomia lokál, inklui fasilita transporte agríkola, turizmu no asesu servisu báziku ba komunidade sira iha munisípiu Ermera. (/SMnews)
Komentariu