Smnewstl.com | Díli, 22 Abril 2026 – Mudansa drastika foun mosu iha Rejiaun Administrativa Espesiál Oekusi Ambenu (RAEOA), bainhira Governu liuhosi Konsellu Ministrus deside ezonera lideransa antigu no entrega komandu foun ba Régio da Cruz, ho misaun atu lori reforma no dinamiza dezenvolvimentu iha rejiaun ne’e.
Konsellu Ministrus aprova projetu Rezolusaun Governu ne’ebé aprezenta hosi Ministru Administrasaun Estatál, Tomás do Rosário Cabral, hodi realiza mudansa iha estrutura lideransa RAEOA.
Desizaun ne’e inklui ezonerasaun ba diretór jerál rejionál no diretór rejionál sira ne’ebé nomeia uluk liuhosi Rezolusaun Governu n.º 37/2025, loron 27 fulan-agostu.
Iha etapa foun ida-ne’e, Governu fó konfiansa ba Régio da Cruz atu asumi kargu Prezidente RAEOA, ho responsabilidade atu lidera transformasaun administrativa no impulsa dezenvolvimentu iha rejiaun ne’e.
Hodi reforsa lideransa foun, Governu mós nomeia Sekretáriu Rejionál sira:
▪︎ Salvador da Cruz (Administrasaun no Finansas)
▪︎ Francisco Loca (Planeamentu no Dezenvolvimentu)
▪︎ Merita Marques Lafo (Asuntu Sosiál no Organizasaun Komunitária)
Nomeasaun ba Diretór Servisu Rejionál sira mós realiza hodi hadia kapasidade institucional no asegura servisu públiku ne’ebé efisiente liu ba populasaun lokal.
Governu subliña katak titulár kargu sira sei avalia kada tinan liuhosi sistema dezempeñu. Rezultadu ne’ebé la satisfatóriu bele sai baze legal atu halo ezonerasaun iha futuru.
Medida ida-ne’e hatudu klaru esforsu Governu atu reforsa governasaun, aumenta efisiénsia no garante servisu públiku ne’ebé responde diak liu ba nesesidade povu iha RAEOA. (/SMnews)
Komentariu