Smnewstl.com | DÍLI, 08 Abríl 2026 – Governu, liu husi Ministru Administrasaun ESTATAL, deside nomeia Celestino Marques nudar Prezidente Rejiaun Administrativa Espesiál Oe-Cusse Ambeno (RAEOA), hafoin Prezidente Régio Servantes Romeia da Cruz Salu la bele hala’o nia knaar tanba problema saúde.
Tuir karta nomeasaun ne’ebe Smnews asesu komfima, desizaun ida ne’e bazeia ba lei sira ne’ebé regula administrasaun públika, liu-liu mekanizmu direitu subsidiáriu, ne’ebé permite nomeasaun substituisaun iha situasaun urgente ka bainhira iha impedimentu ofisiál.
Governu konsidera katak kondisaun atual inklui ausensia Sekretáriu Rejionál sira sai hanesan razaun forte atu asegura kontinuidade servisu públiku iha RAEOA.
Tuir despaxu ofisiál, Celestino Marques, ne’ebé dadaun okupa kargu Diretor Nasionál Apoiu ba Administrasaun Suku sira, sei hala’o kompeténsia sira Prezidente RAEOA nian durante períodu substituisaun.
Nomeasaun ne’e hahú vale husi loron asinatura despaxu no sei termina automatikamente bainhira Prezidente Régio Servantes Romeia da Cruz Salu fila fali atu asumi nia funsaun sira.
Medida ida ne’e konsideradu importante atu garante estabilidade lideransa no kontinuidade governasaun iha rejiaun RAEOA durante períodu impedimentu ida ne’e. (/SMnews)
Komentariu