PM Xanana Hatuur Fatuk Da-Huluk Bá Projetu Rehabilitasaun Estarada Lautém Bá Com

Smnewstl.com —Primeiru-Ministru (PM), Kay Rala Xanana Gusmão hatuur fatuk da-huluk bá projetu rehabilitasaun estrada hosi rotunda Lautém bá Com, munisípiu Lautém, kinta (30/10/2025).

Primeiru-Ministru esplika bá populasaun Lautém katak, lansamentu projetu rehabilitasaun estrada ne’e mak hanaran infraestrutura bázika ne’ebé hola parte iha Planu Estratéjiku Dezenvolvimentu Nasionál 2011-2030.

PEDN ne’e define katak, infraestruturas bázikas mak sai hanesan baze bá dezenvolvimentu. Ida ne’e klasifika tiha ona bá estrada nasionais, estrada rejionais, estradas lokais no estrada rurais.

“Ohin ha’u mai iha-ne’e tanba hakarak atu ita hotu liu-liu komunidade Lautém asiste serimónia asinatura kontratu ho kompañia, ita sai sasin atu nia bele halo ho di’ak no kualidade,” PM Xanana hateten iha diskursu.

Xefe Governu hakarak husu bá komunidade tomak iha ne’e hodi koopera ho kompañia, tanba ida-ne’e sei halo duni bá komunidade. Husu labele halo impedimentu, nune’e bele servisu ho lalais, kualidade no finaliza tuir tempu ne’ebé determina ona.

“Ami mai hotu iha ne’e, ha’u kontente tebes tanba ama ferik sira ho katuas sira barak sei iha hela. Sira ne’e mak luta na’in liu hosi terus oioin durante tinan 24 hodi ita hetan independénsia. Tanba ne’e, ita halo dezenvolvimentu ne’e atu ba sira. Kualkér sé mak sai boot atu ukun iha obrrigasaun atu halo di’ak bá rai ne’e hodi selu sira-nia sakrifísiu,” Xefe Governu haktuir.

Iha fatin hanesan, Ministru Obras Publikas (MOP), Samuel Marçal agradese bá ekipa tomak hosi Ministériu Obras Publikas no Ministériu ho diresaun relevante sira mak servisu hamutuk to’o ohin loron bele halibur ema hotu iha fatin ida-ne’e atu halo lansamentu fatuk da-huluk.

Husu mós bá ema hotu-hotu atu kolabora didi’ak, nune’e kompañia bele finaliza projetu ne’e ho di’ak, kualidade no tuir tempu ne’ebé iha ona.

Iha fatin ne’e Ministru Obras Públikas asina kontratu ho kompañia, no asiste direta hosi Primeiru-Ministru, ministru sira, autoridade munisipál, autoridade lokál, veteranus, sosiedade siviíl, joven, estudante no populasaun hodi hatudu katak, osan ne’e povu nian tenke jere ho di’ak.

Nune’e mós Prezidente Autoridade Munisípiu (PAM) Lautém, Mélio de Jesus agradese bá Primeiru-Ministru, Kay rala Xanana Gusmão ne’ebé servisu makaas hodi realiza duni serimónia hatuur fatuk da-huluk bá projetu rehabilitasaun estrada ida-ne’e.

Iha fatin ne’e nia deklara hodi povu Lautém nia naran katak, sei koopera ho didi’ak ho kompañia atu halo duni estrada ne’ebé populasuan hein durante tinan barak nia laran.

Projetu rehabilitasaun estrada Lautém bá Com ne’e ho nia sesaun STA 182+040-STA.201+800 (19.760 Km) ho montante orsamentu $11, 213, 813.30 ne’ebé superviziona hosi Ministériu Obras Públikas.

Durasaun servisu durante loron 365 ho númeru kontratu: TENDER/175/MOP/2024, responsabiliza hosi SHA SNXI Construction engineering Group Coorporation Limited (China).

Partisipa iha serimónia lansamentu ne’e asiste direta hosi  Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, ho membru governu sira, autoridade munisipál, autoridade lokál, veteranus, sosiedade sivíl, joven, estudante no populasaun. (*/Smnews)