Ministeriu Defeza No Instituisaun Tuteladaa Aprezenta Ona Tetu OJE 2026 Ba KRO

Smnewstl.com—Ministériu Defeza (MD), lidera hosi Donaciano do Rosário Gomes aprezenta ona tetu no proposta Orsamentu Jerál Estadu (OJE), tinan 2026 bá Komite Revizaun Orsamentál (KRO), ne’ebé lidera hosi Primeiru-Ministru, Kay Rala Xanana Gusmão, iha Auditóriu Ministériu Finansa, Aitarak-Laran, segunda (11/08/2025).

Iha okaziaun ne’e, Responsável Instituisaun tutelada sira aprezenta mós orsamentu hanesan FALINTIL-Forsa Defeza Timor-Leste (F-FDTL), Institutu Defeza Nasionál (lDN).

Ministru Defeza, Donaciano da Costa Gomes esklarese katak, orsamentu ne’ebé Ministériu Finansas atribui hamutuk millaun $8-resin. Enkuantu F-FDTL nian millaun $31-resin no IDN hamutuk millaun $1-resin.

Ministériu Defeza koloka adisionál millaun $49 hodi haree liu ba área sira hanesan implementa lei programasaun. F-FDTL iha millaun $12 ho intensaun atu aumenta efetivu no bem-star militár sira nian. Enkuantu IDN tanba tinan oin (2026) hahú ona Akademia militár konjunta, ne’ebé sei iha tan militár foun ou kadetis akademia nian foun entaun sira husu adisionál millaun $1-resin.

‘’Proposta ne’ebé instituisaun sira ne’e aprezenta liuhusi Ministériu Defeza iha konsiderasaun di’ak husi Ministériu Finansas liu-liu husi Komisaun Revizaun Orsamentu tuir rekomendasaun husi Prezidente komisaun sei halo diskusaun ho Ministériu Finansas hodi bele prioritiza oinsá mak bele atribui orsamentu adisionál ne’ebé maka entidade tolu ne’e solisita ‘’, Ministru Donaciano dehan.

Reuniaun KRO ne’e prezide direta hosi Xefe Governu ho prezensa hosi Vise-Primeiru-Ministru no Ministru Koordenadór Asuntos Ekonómiku, Francisco Kalbuadi Lay, Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, Ministra Finansas, Santina José Rodrigues Viegas Cardoso, Ministru Planeamentu no Investimentu Estratéjiku, Gastão Francisco de Sousa no Vise-Ministra Finansas, Felícia Claudinanda Cruz Carvalho.

Reuniaun KRO ne’e hala’o iha salaun Ministériu Finansas (MF) Aitarak-Laran hahú iha tersa (05/08/2025) no tuir Kalendáriu bá reuniaun Komité Revizaun Orsamentu 2026 sei remata iha sábadu (23/08/2025). (*/Smnews)