Smnewstl.com—Ekipa Prezidénsia Repúblika, liu husi Unidade Serbisu Sosiedade Sivil no Asuntu Sosiál, hala’o vizita ba familia oan kiak nain ha’at iha Aldeia Gumer, Suku Lourba, Postu Administrativu Bobonaro, ne’ebé mak hetan benefísiu konstrusaun uma mahon ida, tuir autorizasaun Prezidente J. Ramos-Horta nian, hanesan resposta ba proposta formal husi lideransa lokal.
Antes ne’e Ekipa Prezidénsia halo vizita no avalia situasaun moris ba família ne’e nian, ne’ebé hela iha kondisaun lakon inan-aman. Sira nia aman mate iha tinan 2019 no inan mate iha tinan 2022. Sira hotu sei ki’ik no hetan kuidadu husi Tiu/Avo sira ne’ebé hela besik.
Francisca da Costa ho tinan-17 sai bin ida hodi tau matan ba nia alin nain tolu, iha uma ki’ik ne’ebé kondisaun moris ladun di’ak. Iha tempu udan no anin, iha uma laran sira hetan bokon tanba kondisaun uma ladun fo protesaun.
Observasaun ekipa ne’e hala’o tuir kordenasaun ho Xefi Suku Lourba, Sr. Lino da Cruz, ho lideransa komunitária sira. Proposta formal diriji ba Gabinete Prezidénsia no direta ba Prezidente J. Ramos-Horta, tan ne’e fó autorizasaun hodi konstrui uma mahon ida ba sira.
Konstrusaun uma ne’e foin maka atinji progresu 75%. Uma foun ida ne’e sei kompleta ho kuartu tolu (3), sala han, dapur, varanda no haris haris ketak. Ne’e hanesan residénsia dignu no seguru ba labarik sira iha moris ne’ebé fó esperansa foun.
Alin feto Francisca da Costa, hato’o nia gratidaun ba Prezidente J. Ramos-Horta no ekipa sira:
“Obrigadu ba Abo Ramos tanba halo ona uma ida mai ami no obrigadu ba ekipa sira ne’ebé serbisu besik atu hotu ona,” — hateten Francisca.
Inisiativa solidariedade ne’e fó ezemplu klaru kona-ba komprimisiu Prezidénsia Repúblika J. Ramos-Horta nian, atu responde ba nesesidade komunidade no evidénsia responsabilidade estadu atu garante dignidade, seguransa no moris di’ak ba labarik sira iha Timor-Leste. (*/Smnews)
Komentariu