SMnewstl.com 12 Augosto 2026- Ministériu Negósius Estranjeirus no Kooperasaun (MNEC) Bendito dos Santos Freitas aprezenta ona ba Konsellu Ministru kona ba preparasaun Timor-Leste ba Reuniaun Ordinária XXXI Konsellu Ministru Komunidade País Lian Portugés (CPLP), ne’ebé sei hala’o iha Díli, loron 19 Agostu 2026.
Reuniaun Ordinária XXXI ne’e sei hala’o iha ámbitu Prezidénsia Pro Tempore CPLP Timor-Leste nian, ho tema “Konsolidasaun Estadu Direitu Demokrátiku no Dezafiu Sira CPLP Nian.”
Reuniaun sei fó atensaun ba koordenasaun polítika no diplomátika, kooperasaun entre Estadu-Membru sira, situasaun iha Guiné-Bissau, preparasaun ba Prezidénsia CPLP tuirmai no definisaun orientasaun estratéjika Organizasaun nian.
Aleinde asuntu polítiku no diplomátiku, sei diskute mos Akordu Administrativu ba Aplikasaun Konvensaun Multilaterál Seguransa Sosiál CPLP, ho objetivu atu reforsa protesaun sosiál no portabilidade direitu seguransa sosiál ba sidadaun sira iha espasu CPLP.
Reuniaun sei mos konsidera Deklarasaun kona-ba “Konsolidasaun Estadu Direitu Demokrátiku no Dezafiu Sira CPLP Nian,” ne’ebé reafirma kompromisu Estadu-Membru sira atu hametin prinsipiu demokrátiku, Estadu Direitu no koordenasaun polítika-diplomátika.
Ho responsabilidade nu’udar Prezidénsia Pro Tempore CPLP, Timor-Leste uza oportunidade ne’e atu hametin kooperasaun entre país-membru sira no aumenta nia papel iha espasu CPLP.
Lee nain: 10
Lee Mós:
PR Ramos -Horta Partisipa Selebrasaun Misa Agradesimento Ba Tinan 100 Prezensa Saleziana Don Bosco Iha Timor- Leste