Motor Beat ‘Okupa Primeiru Lugar’ Asidente Iha Fulan Agostu

Smnewstl.com 07-09-2021 (Dili) — Tuir dadus ne’ebé relata husi Departamentu Tránzitu Seguransa Roduviáriu Nasionál hatudu, asidentes iha fulan Agostu ne’e, maioria domina husi motorizada ho marka Beat.

Komandante Polísia Tránzitu Nasionál, Superintendente João dos Reis Belo hateten, iha fulan Agostu ne’e, polísia tránzitu nasionál rejista hamutuk 115, kauza ema na’in 7 lakon vida, no kanek todan 16.

“Totál asidente ne’ebé mak akontese iha fulan Agostu laran hamutuk 115 asidentes, ne’ebé kauza ema mate na’in 7, kanek todan 16, kanek kaman 133. Totál asidentes ne’ebé ohin ha’u mensiona, fatór umanu kontribui bá 90%, depois asidentes sira-ne’e ami nota katak, domina husi motor beat, husi 115 asidentes motor Beat okupa númeru 1 kontribui asidentes 65 iha fulan ida-ne’e nia laran,” dehan Superintendente João dos Reis Belo, iha komferénsia imprensa iha Komandu Jerál PNTL, Tersa ohin.

Departamentu Tránzitu Seguransa Roduviáriu Nasionál, apela utilizadór transporte públiku no privadu, no mós kareta estadu sira, bainhira uza transporte tenki kompleta xapa matríkula oin ho kotuk.

Nune’e mós João dos Reis Belo mós apela bá utentes sira, atu respeita kódiku estrada, bainhira kondus motorizada, tenki uza kapesete (helem) nune’e bainhira mosu asidente bele salva vida.

“Ha’u apela mós bá transporte governu kareta sira, tenki kompleta ho xapa matríkula oin no kotuk. Segundu, bá utilizadór transporte motorizada sira, tenki uza kapesete par salva ita-nia vida, tanba ita-nia ne’e la fa’an iha loja, ita-nia ulun fatuk la fa’an iha loja, kuandu ita uza transporte bá mai, kuandu involve iha asidente ruma maioria kauza bá ita-nia ulun fatuk, tanba ne’e mak tránzitu sempre ejize sempre fó hanoin beibeik, kuandu uza transporte respeita bá kódiku estrada, respeita mós ita-nia vida,” apela nia.

Alem de ne’e, Komandante Polísia Nasionál ne’e mós husu bá inan-aman sira, atu labele fó motor ho kareta bá oan sira-ne’ebé sei minor idade kondus, tanba labarik sira-nia konsiénsia no koñesimentu bá regras tránzitu sei menus tebes.

“Inan-aman sira tenki kuidadu labele fó motor ho kareta bá ita-nia oan sira-ne’ebé idade sei ki’ik, tanba sira-nia konsiénsia atu uza estrada públiku respeita bá lei, komprende bá sinais sira-ne’e seidauk iha, tanba ne’e tránzitu nasionál apela nafatin bá inan-aman sira labele fó transporte bá oan sira atu kondus, tanba ne’e perigu, asidente barak involve labarik minor idade tanba sira lahatene regras,” subliña João dos Reis Belo.

Entretantu, iha fulan Agostu ne’e, Departamentu Tránzitu Seguransa Roduviáriu Nasionál, hatama osan bá kofre estadu hamutuk $ 30.279 dólar.

“Depois totál reseitas husi sirkulasaun transporte estranjeiru ne’ebé mak tama iha territóriu nasionál hamutuk $ 8.514, ne’e hatama husi parte Motaain no mós mota masin, ita-nia postu tránzitu mós destaka iha ne’ebá, transporte estrajeiru autoriza sira tama ita kobra hamutuk $ 8.514 dólar,” relata nia.(ant)