Luís Inácio Henriques Fernandes mak Prezidente Autoridade Munisipál Manatuto

Smnewstl. com– Prezidente Autoridade Munisipál Manatuto, Luís Inácio Henriques Fernandes agradese ba konfiansa husi governu, hodi substitui Bernado Lopes, hodi lidera Munisipiu Manatutu.

“Ha’u la haluha hato’o agradesimentu wa’in ba Primeiru Ministru Kay Rala Xanana Gusmão ne’ebé depozita konfiánsa mai ha’u ho partisipasaun povu Manatutu nian ha’u simu imi nia fiar tomak mai ha’u nu’udar Prezidente Autoridade”, dehan Prezidente Autoridade Munisípiu Manatuto.

Prezidente Autoridade Munisípiu promete esforsu no hametin liután no serví duni prioridade polítika no programa governu konstitusionál da-9 nian hodi lori povu Manatuto ba moris ne’ebé di’ak.

“Ha’u sei assegura duni prioridade polítika no programa Governu Konstitusional Da-sia nian, nune’e bele lori Povu Manatuto ba moris ne’ebé di’ak liu, no lori Manatuto nu’udar Munisípiu ne’ebé dezenvolvidu iha setor hotu-hotu”, Promete líder munisipal ne’e.

Luís Inácio Henriques Fernandes, hasai kursu lisensiadu iha area Gestaun no Ekonomia, no dezempeñu funsaun hanesan Inspetor no Auditor Interno no Diretor Jeral Ministériu Komersiu Industria no Ambiente, durante IV, V,VI, VII no VIII Governu Kontitusional.

Iha okaziaun ne’e, Ministru Administrasaun Estatal, Tomas Cabral mos fo posse ba Sekretáriu Munisípiu no Diretores Servisus Munisipais Manatuto nian, Administrador Postu Administrativu Barique, José Ramos, Ernesto Clementino dos Reis Ferreira Sarmento ba Postu Administrativu Laclubar, Francisco Jacinto Ximenes ba Postu Administrativu Laleia, José Pedro da Cunha ba Postu Administrativu Manatutu, Terezinha da Costa Moniz lidera Postu Administrativu Soibada,

Ministru Administrasaun Estatal, Tomás do Rosário Cabral, husu ba Sekretáriu Munisípiu no Diretores Servisus Munisipais, atu servisu hamutuk ho Prezidente Autoridade, hodi lori susesu ba Munisípiu Manatuto.

“Ohin Ita-Boot sira halo juramentu iha Amu nia oin, ka’er ba Biblia, la-iha ema ida atu kontra desizaun Autoridade nian, Autoridade iha diretu atu informa ba Ami ka informa ba Primeiru Ministru, se mak la obedese di’ak liu Ita hasees lai, tanba Povu presiza dezenvolvimentu”. Tenik Tomas Cabral.

Tomada de posse ba Prezidente Autoridade Munisipal, Sekretariu no Diretores Munisipal partisipa husi Ministra Edukasaun, Dulce de Jesus ho membru governu seluk, veteranus, diplomata sira no mos entidade seluk.(Smnews)