Igreza Reafirma Pozisaun ba Kazu Topu Honis, Husu Atu la Interven Prosesu Judisial

Smnewstl.com Media Online — Igreja katólika iha Timor-Leste liu husi komunika imprensa hodi reafima pozisaun bá kazu Topu Honis no promete sei la halo intervensaun bá prosesu judisiál ligadu ho kazu violasaun seksual, ne’ebe diskumfia involve eis Padre Richard Daschbách.

Tuir komunikadu imprensa Sekretariadu Kámara Ekleziástika dioseze Dili, fó sai iha loron 22 fulan-jullu tinan 2021, ne’ebé Smnewstl.com asesu iha loron 23 fulan-jullu tinan 2021.

Relasiona ho declarasaun Amu bálun iha Arkidioseze kona-ba prosesu investigasaun kazu Topo Honis, Arquidiocese hakarak fó hanoin dala ida tan bá Padres, Relijiozus no relijiozas, Diákonus, Fraters, no Agente Pastoral sira katak Richard Dasbach laos ona Padre.

“Señór Richard Daschbách hetan tiha ona nia Sentença hosi Doutrina da Fé, Prot No 208/2018-67069, 06 de novembro de 2018, housi Amu Papa Francisco katak, nia la’ós ona padre, maibé nu’udar leigo. 2, nu’udar Decreto hosi Santu Padre, ne’e duni la iha tan ida atu ko’alia kona-bá sacerdocio ex-padre nian ne’e,” haktuir husi komunikadu imprensa ne’e.

Parte terseiru maka, igreja katólika husu bá Padres, Diákonus, Fraters, Madres no Ajente Pastoral hotu respeita bá decretu ne’e no laiha tan komentáriu, tanba amu Papa nia desizaun ne’e mai husi prosesu kle’an no naruk ida no ikus hodi hasai desizaun finál ida.

Apela mós bá Padres, Madres, Diákonus, Fraters no Ajente Pastoral sira atu la intervem iha prosesu justisa ne’ebé ministériu públiku halo hela.

“Mai ita kolabora no fó apoiu tomak bá ministériu públiku atu halo lolos prosesu justisa hodi fó apoiu bá vítima sira. Dala ida tan husu lta hotu respeita no halo tuir desizaun Amu Papa nian,” tenik nia.(*/Ant)