Smnewstl.com | Dili, 20 Abril 2026 – Polísia Nasional Timor-Leste (PNTL) konfirma katak sidadaun cineza nain rua ne’ebé alegadamente halai sai husi Timor-Leste la inkluí iha lista identifikasaun ofisiál ne’ebé autoridade sira utiliza ba monitorizasaun.
Porta voz PNTL, Superintendenti Xefe João Belo dos Reis afirma ne’e hodi hata’an jornalista ligado ho sidadaun Xineza rua ne’ebe alegadamente diskumfia utiliza osan falsu ho nota $ 100 ba kompra iha loja Supermercado Centro iha loron hirak liu ba, hafoin makina detekta no husik ona Timor-Leste hodi halai ba nasaun origem Domingo, (19-04) ho aviaun komersial Citilink.
Atual Komandante Diresaun Servisu Investigasaun Kriminal ne’e reforsa katak, servisu ne’ebe nia parte halao exekuta delegasaun kompetensia ne’ebe Ministériu Publiku atribui, autor balun iha lista no balun mos iha identifikasaun laran.
Tamba ne’e, husu atu la espalha informasaun arbiru no husik prosesu identifikasaun mak termina. “Ba se deit mak involve, ami sei bolu, ne’e partensia ba segredu justisa, hau sei la pronunsia, karik fo sai ema, sira ne’e bele halai hotu,”haktuir Belo.
Maske afirma katak, sidadaun xineza rua ne’ebe husik ona Timor-Leste la inklui iha lista monitorizasaun, observasaun Smnews Domingo (19/04), Komandante DSIK ho ekipa to’o iha Aeroporto Internasional Nicolao Lobato Comoro Dili, iha oras tuku 12.30 liu hodi halo impedimentu bazeia ba informasaun ne’ebe hetan.
Iha Aeroporto, tuir informasaun ne’ebe Smnews asesu, Superintendenti Xefe João halo komfirmasaun direita ho parte autoridade imigrasaun hodi bele trava sidadaun rua refere, maibé la konsege tamba suspeitu sira ultrapasa tiha ona prosesu check-in no aviaun hahú ona semo, nune’e labele hatun fali.
Relasiona ho ne’e, ekipa Smnews tenta halo komfirmasaun kedas ho Komandante Diresaun Servisu Investigasaun Kriminál, Superintendente Xefi, João Belo dos Reis iha Aeroporto Internasional Nicolao Lobato Comoro Dili, maibe la konsege.
Liu husi Konferénsia Imprensa Segunda-feira, (20/04) iha Komando Jeral PNTL Superintendente Polísia João Belo dos Reis dismente informasaun hodi fó klarifikasaun katak naran sidadaun rua ne’e la inkluí iha lista identifikasaun ofisiál ne’ebé autoridade sira utiliza.
Lista refere konsidera hanesan dokumentu importante atu halo monitorizasaun ba sidadaun estranjeiru sira ne’ebé presiza atensaun espesífika husi autoridade kompetente sira.
Maski nune’e, PNTL afirma katak sei kontinua halo akompañamentu no koordena ho entidade relevante sira atu asegura katak situasaun seguransa iha rai laran nafatin kontroladu no estável. (/SMnews)
Komentariu