SMnewstl.com DILI 07 Maio 2026-Ministru Obras Públikas (MOP),Samuel Marçal, komfirma katak projetu konstrusaun estrada husi gleno liga letefoho seidak bele implementa tanba atrazu husi Autoridade Nasionál Lisensiamentu Ambiental (ANLA) ne’eebe seidauk fó lisensa ba kompanhia atu harii akampamentu.
Tuir Ministru Samuel Marçal dehan kompanhia ne’ebé responsabiliza ba projetu ne’e prepara ona ekipamentu no rekursu sira hodi hahú konstrusaun, no ekipa tekniku husi Ministériu Obras Públikas mos halo ona observasaun iha fatin projetu.
“Hau rona katak kompanhia prepara ona, no hau nia ekipa mos ba hare ona. Maibé husi ANLA seidauk fó lisensa ba kompanhia atu tau sira nia akampamentu, tanba ne’e mak sei iha problema nafatin,” hatete ministru MOP.
Tuir governante ne’e, Governu iha esperansa atu projetu estrada ne’e bele hahú ho lalais, maibé prosesu lisensiamentu ambiental ne’ebé seidauk remata husi ANLA sai obstákulu ida ba implementasaun projetu.
Ministru Samuel Marçal esplika katak kompanhia seidauk bele harii akampamentu no fasilidade apoiu sira antes hetan autorizasaun oficial husi autoridade ambiental.
Maski nune’e, Governu kontinua halo esforsu atu rezolve problema ne’e iha tempu badak, atu projetu konstrusaun estrada bele lao tuir planu ne’ebé estabelese ona.
Rekorda katak projeito Estrada gleno liga ba letefoho ,hahu lansamentu ofisiál hosi Kay Rala Xanana Gusmão iha 26 Janeiru 2026 iha Eraulu munisipiu ermera , hanesan parte ida husi estratéjia Governu atu moderniza infraestrutura iha rai-laran,no kompanha ne’ebe manan ba projeito ne’e mak China Civil Engineering Construction Corporation (CCECC) ho valór orsamento USD $38.8 miliaun,hodi implementa projetu ne’e no kobre estrada hamutuk kilómetru 84, 30 km iha Letefoho no 54 km iha Gleno, ho prazu servisu tinan ida fulan walu.
Projetu estrada Gleno–Letefoho konsidera nu’udar etapa importante ida atu loke oportunidade foun ba ekonomia lokál, inklui fasilita transporte agríkola, turizmu no asesu servisu báziku ba komunidade sira iha munisípiu Ermera. (/SMnews)
Komentariu