Smnewstl.com | Díli, 29 Abril 2026 – Ministru Administrasaun Estatál (MAE), Tomás do Rosário Cabral, konvoka reuniaun importante ho Prezidenti Autoridade Munisipál (PAM), Prezidenti Autoridade Administrativa Adjunta (PAAA) no Diretor Jerál relevante sira iha MAE, atu halo aprezentasaun rezultadu Avaliasaun Kondisaun Mínima ba munisípiu sira.
Iha reuniaun ne’e, Ministru Cabral hato’o rezumu relatoriu vizita traballu husi Primeiru-Ministru ba munisípiu sira, ne’ebé rekolla informasaun diretu husi terenu liu husi dialogu ho autoridade lokal sira.
Avaliasaun ne’e hatudu klaru kona-ba kapasidade funsionamentu Autoridade Munisipál sira, inklui identifikasaun problema komum no nesesidade atu reforsa kordenasaun entre governu sentral ho nivel lokal.
Relatoriu ne’e mós subliña área kritiku sira hanesan organizasaun administrativa, gestaun finanseira, aprovizionamentu, rekursus humanus no prestasaun servisu públiku, ne’ebé sei presiza atensaun urjente atu hadia.
Husi rekomendasaun MAE, munisípiu sira husu atu aumenta reuniaun regular hodi fortalesé kordenasaun no alinamentu servisu, inklui aumenta prezensa PAM sira iha terenu atu kompriende liu tan realidade komunidade nian.
Iha diskusaun mos, enfatiza nesesidade atu reforsa fiskalizasaun programa sira no hadia sistema administrativu tuir orientasaun Primeiru-Ministru, ho objetivu atu jere rekursu públiku ho rigor, transparénsia no responsabilidade, no evita prátika favoresimentu pesoal ka polítiku.
Iha área planeamentu, governu lokal orienta atu identifika didiak nesesidade real komunidade nian no prepara resposta ho antesedénsia, ho baze ba étika no koperasaun institusional atu proteje interese públiku.
Iha sesaun tekniku, Direção-Geral relevante sira hanesan DGSMAL, DGDGL, DGTOU no DGDL aprezenta materia importante inklui perfil munisipal, sistema korespondénsia, SOP/TOR no relatoriu servisu delegadu, atu fó apoiu konkretu ba dezenvolvimentu no kapasidade munisípiu sira.
Reuniaun ne’e sai hanesan sinal forte katak Governu sei aumenta presizaun no kontrolu iha nivel lokal, hodi asegura servisu públiku ne’ebé diak liu, efisiente no responde ba nesesidade povu Timor-Leste. (/SMnews)
Komentariu