SMnewstl.com BAUCAU ||18 Abríl 2026-Prezidente Repúblika, J. Ramos-Horta halo lansamentu ba konstrusaun uma hodi oferese ba sidadaun ema ho difisiénsia, Justino Guterres ho nia alin ne’ebé moris ho kondisaun vulnerável iha Postu-Administrativu Venilale, Munisípiu Baucau.
Prezidente Repúblika, J. Ramos-Horta esplika katak dalaruma programa sosiál sira sempre dehan katak mai husi programa guvernu maibé Prezidénsia Repúblika la hein, bainhira identifika katak iha duni nessesidade atu fó ajudu umanitáriu ba família vulnerável ho rápidamentu Prezidénsia Repúblika fó ajudu, hanesan saida mak halo ba Justino ho nia família.
Ne’e jestu solidariedade husi Timor-oan ba Timor-oan ne’ebé presija liu tulun tambá mandatu Prezidente Repúblika, J. Ramos-Horta hakarak Prezidénsia ida nakloke ba sidadaun hotu hodi hetan ajudu tuir kbi’it ne’ebé iha.
Xefe Suku Estanislau Guteres Agradese ba PR Horta nia apoiu neebe ajuda husi Presidente Repúblika tamba justinho durante moris la bele bok an no labele hetan servisu
Xefe suku nee husu ba Presidente Repúblika ba projetu neebe lançamentu nuudar Autoridade lokal servisu hamutuk ho komunidade atu nunee bele finaliza projetu refere iha tempu badak
Entretantu, durante tinan 4 ikus ne’e, Justino sempre tur iha dalan ninin husi diresaun Baucau ba Viqueque hodi husu ajuda atu sustenta nia moris maibé iha tinan kotuk hafoin ekipa Unidade Servisu Sosiál no Apoiu Sosiál Prezidénsia Repúblika (SSAS) lidera husi Quintiliano Moníz halo identifikasaun no hato’o pedidu ba Prezidente Repúblika, ikus mai aprova no ohin halo lansamentu ba uma refere ho medida 7×5, kompleta ho mobiliáriu uma laran nian no sei prontu iha fulan tolu tuir mai. Atividade hanesan la’ós foin akontese, maibé akontese ona ba família vulnerável sira dézde 2022 to’o agora.
Hafoin remata lansamentu, Prezidente Repúblika, J. Ramos-Horta akompaña husi Ministru Agrikultura, Pekuária, Peskas no Floresta, Marcos “MAMETA’’ da Cruz, Vise-Ministru Komérsiu no Indústria, Agusto Junior, PAM Baucau, Veneranda Lemos hamutuk komadante PNTL munisípiu Baucau , fahe mos nessesidade bázika ba família kbi’it natoon sira ho total 40-resin. (/SMnews)
Komentariu