Autoridade Indonézia Kaer Tan Timoroan 324

Smnewstl.com -ATAMBUA- Autoridade Seguransa (Polri) Atambua Indonézia kuarta (19/08) kalan, detein tan Timoroan nain 324 inklui feto 24 neebé halo viazen ilegál ba Atambua Indonézia.

Timoroan hirak hosi Organizasaun Persauderaan Seti Hati Terrate (PSHT) nee halo viazen ilegál hosi fronteira Timor-Leste ba Atambua atu partisipa serimónia sae sintu.

Timoroan hirak nee parte seguransa kaer iha sira nia área subar fatin atu konsetra sae sabuk, hafoin hetan keixa hosi parte komunidade Atambua, nunee parte polisia halo kedas asaun rapida no halo buska no detein sira.

Dadaun nee abitante hirak nee parte Polri Atambua Indonézia lori ona ba Polres Atambua hodi halo investigasaun klean kona-ba sira nia prezensa ilegál ba Atambua.

Tuir informasaun neebé neebé smnews rekolla, Kinta (19/08) dadersan nee, Konsuladu Timor-Leste ba Atambua Indonézia, João Simão Sousa ho ekipa protokolu halao ona vizita hodi ba haree sira nia kondisaun inklui koopera ho Vice Governadór Belu, Drs Aloysius Haleserens, MM, Xefe Migrasaun Klase I-TPI Atambua K.A. Halim atu deporta abitante hirak nee fila mai Timor-Leste.

Too notisia nee hatun, SMNews seidauk halo konfirmasaun ho Komandante Unidade Polisia Fronteira (UPF), Superintendente, Euclides Belo.

Antes nee, Komandante UPF Komandante Unidade Polisia Fronteira (UPF), Superintendente, Euclides Belo konsidera viazen ilegál Timoroan sira ba Atambua konsidera krime no sei prosesa sira tuir lei.

Euclides mós hatutan, UPF sei kontinua halo patrulliamentu iha liña fronteira hodi kontrola movimentu ilegál hodi evita tranmisaun peste letál COVID-19. (Ant)