Smnewstl.com — Iha marjen Enkontru Ministerial ASEAN bá dala-58, Ministru Negósiu Estranjeiru no Kooperasaun, Bendito dos Santos Freitas hasoru malu ho nia omólogu Ministru Estadu no Negósiu Estranjeiru Repúblika Índia, Pabitra Margherita, hodi diskursu reforsu kooperasaun entre nasaun rua.
Diskusaun ne’e foka bá hametin kooperasaun bilateral nasaun rua nian iha área siénsia no teknolojia no mós indústria farmaséutika ne’ebé Prezidente Repúblika, José Ramos-Horta ko’alia ona ho Primeiru-Ministru Índia, Narendra Modi iha Gujarat Índia.
“Ko’alia mós kona-ba kooperasaun bilateral ne’ebé tau-matan liu kona-ba siénsia no teknolojia, indústria farmaséutika ne’ebé importante tebetebes durante vizita Prezidente Repúblika bá Gujarat Índia,” dehan Ministru Bendito Freitas.
Ministru Negósiu Estranjeiru Índia mós kongratula Timor-Leste, tanba iha ona indikasaun atu formaliza prosesu adezaun bá ASEAN iha fulan-Outubru tinan ne’e.
Entretantu enkontru ne’e akompaña husi Vise-Ministra bá Asuntu ASEAN, Milena Rangel, Embaixadór Timor-Leste bá Malázia, Lisualdo Gaspar, Embaixadora Timor-Leste bá ASEAN, Natércia Coelho, Diretór-Jerál bá Asuntu ASEAN, Elisa da Silva.(*/Smnews)
Komentariu