Smnewstl.com – Kompañia Precision Solutions Group (PSG) husi Austrália planeia atu investe osan hamutuk millaun U$6 iha área textile no manufatura iha Timor-Leste.
Atu realiza planu investimentu ne’e, Jestor Jeral PSG, Richard William ne’ebé akompaña husi Embaixadora Timor-Leste ba Austrália, Inês Almeida no staff ida husi TradeInvest Timor-Leste nian hasoru malu ona ho Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Sua Exselensia Francisco Kalbuadi Lay iha Farol-Dili, Kuarta 16 Agusto 2023.
Jestor Jeral PSG, Richard William esplika ba Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Sua Exselensia Francisco Kalbuadi Lay katak, ho valor investimentu ne’e sei loke kampu serbisu ba Timoroan sira hamutuk 1200. No mós, sei halo observasaun ba demanda merkadu tantu iha rai-laran no rejional, tanba problema boot mak merkadu produtividade ba traballador sira.
“Ami foti Timor hanesan merkadu sentral ida, sei laiha esploitasaun ba ema no natureza katak, ami nia manufatura sei hare liu-ba protesaun ambiental ho protesaun sosial ba ema nia moris katak, ema nu’udar ema, traballador nu’udar ema. Ami lakohi halo esploitasaun hanesan saida mak akontese iha India, Bangladesh, Nepal no nasaun sira seluk,” Jestor Jeral PSG, Richard William hato’o planu investimentu ne’e ba Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Sua Exselensia Francisco Kalbuadi Lay iha Farol-Dili, Kuarta 16 Agusto 2023.
PSG mós husu ba governu atu hare mekanizmu sira balun, liu-liu ba prosesu dezenvolvimentu ba forsa traballu iha Timor atu oinsa bele halo formasaun antes empreza traballador sira nune’e bele dudu merkadu ne’e la’o ba oin ho di’ak.
William mós informa ba Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Sua Exselensia Francisco Kalbuadi Lay katak, nain ba PSG ne’e mesak veteran INTERFET de’it ne’ebé mai hala’o misaun Manutensaun ba Paz ONU nian iha Timor-Leste iha tinan 1999.
“Ami hakarak halo buat ruma iha Timor atu hamenus Timor-oan sira labele sai hotu ba serbisu iha rai-liur,” afirma William.
William dehan, PSG sei marka prezensa mós iha eventu Dili Business Forum ne’ebé sei realiza iha fulan Setembru to’o Outubru iha tinan ida ne’e.
Hatan ba planu investimentu ne’e, Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Sua Exselensia Francisco Kalbuadi Lay hateten, nu’udar governante ne’ebé tau matan ba área ekonomia no investimentu sira, governu prontu atu suporta inisiativa ne’e.
“Planu ne’e positivu tebes no Precision Solutions Group (PSG) sei mai investe maibé, sira mós sei fó formasaun ba Timor-oan sira atu serbisu iha tekstil, produz material ne’ebé eziste iha Timor nune’e bele fa’an ba merkadu estranjeiru sira hanesan ba Estadu Unidus Amerika no Europea,” esplika Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Sua Exselensia Francisco Kalbuadi Lay. (Smnews)
Komentariu