Smnewstl, 22-07-2022 – (Maubisi) Srani iha Lumluli Maulau, Posto Administrativo Maubisi, Municipio Ainaro agradese ba família Key Xavier ne’ebe durante tinan naruk konsege realiza sira nia mehi.
Hahu kedas husi tempu invazaun sofre ba persegisaun hodi lá goja liberdade kauza husi luta ba libertasaun pátria, iha fali era independência mos srani Suco refere kontinua moris iha inserteza nia laran.
Realidade aliende halerik ba kondisaun infra-estrutura, Estrada, Be’e mos no Eletricidade hasoru mos problema ba iha espasu hodi hametin fiar.
Hare ba realidade ne’ebe povo Suco refere infrenta, Key Xavier (Emprezario tinoroan), ne’ebe rona susar no halerik iha tinan kotuk lá tu’ur nonok hodi halao kedas visita ba iha neba.
Iha vizita, ba responsável masimu kompanha BEDFORD ne’e, komunidade sira husu atu finaliza hela Kapela ne’ebe sira rasik mak konstroi ho lolo liman.
Liu husi prosesu naruk ligado ho problema infra-estruturas li-liu estrada ne’ebe dá-la ruma difikulta transportasaun ekipamentos, ikus mai ho grasa maromak nian, empresário timoroan oan ne’e konsege finaliza duni kapela ne’ebe srani sira hein nune’e horseik bele inaugura husi Arcebispo Metropolitano Dom Virgílio do Carmo da Silva ho sasin mos Membro Governo inklui autoridade.
Ba srani sira, Key rekuinese kbi’it oituan ne’ebe nia hetan sempre fahe ba hirak ne’ebe presiza. Tamba ne’e, nia konsidera laos importansia husi osan ne’ebe hasai, maibe oinsa maka bele tulun hikas sira ne’ebe presiza tebes.
“Buat saída mak hau halo mai husi fuan ho laran, basa buat hotu ne’ebe hetan hanesan grasa no provisório deit, iha ne’ebe laiha ema mak sei bele lori bainhira nia maté. Hau sente kontenti bele fahe tutan buat ne’ebe hau hetan ba hirak ne’ebe presiza,”haktuir Key ho expresaun ne’ebe nakonu ho domin. (Rio)
Komentariu