Smnewstl.com 27-01-2022 (Dili) — Sekretáriu Jerál g7+, Helder da Costa informa, g7+ sei konvida membru sira atu partisipa iha nu’udar observador atu observa prosesu eleisaun prezidensiál iha Timor-Leste.
Helder da Costa dehan, g7+ sei servisu hamutuk ho órgaun eleitorál Komisaun Nasionál Eleisoens (CNE) no Sekretariadu Tékniku Administrasaun Eleitorál (STAE) durante prosesu eleisaun.
“Iha oportunidade ne’e, atan ha’u mós atu anunsia katak, ita atu hakat ona bá iha periódu eleisaun Timor-Leste, g7+ mós sei servisu hamutuk ho STAE ho CNE atu bele mós involve membrus balun husi g7+ atu partisipa hanesan observador internasionál hanesan mós Uniaun Europea, CPLP ho membru sira seluk,” dehan Sekretáriu Jerál g7+, Helder da Costa, iha sede Sekretariadu g7+ iha Akait, Dili, kinta ne’e.
g7+ seidauk ko’alia ho órgaun eleitorál hanesan STAE no CNE, tanba Tribunál Rekursu eaksk seidauk deklara kandidatu Prezidente Repúblika na’in hira mak sei kompete iha eleisaun prezidensiál ne’e.
“Ami sei servisu hamutuk lai ho CNE, tanba agora daduak ita seidauk hatene ita-nia kandidatu na’in hira, prosesu ne’e liu tiha, kuandu rejístu hotu ona ofisialmente iha Tribunál. Husi ami g7+ nu’udar organizasaun internasionál, ami mós sei husu bá STAE ho mós CNE par ami bele servisu hamutuk, hodi nune’e bele identifika na’in hira orsida mak ami deside,” dehan Helder.
Entretantu, observador internasionál ne’ebé g7+ sei haruka kada nasaun membru na’in tolu liu-liu husi nasaun anglu fon, kuzu fon ho franku fon.
Nia hatutan, iha tinan 5 liu bá, g7+ iha reprezentante ida mai partisipa hanesan observador, tanba ne’e, eleisaun prezidensiál tinan ida-ne’e hakarak di’ak ho profisionál no formál liután.(ant)
Komentariu