Smnewstl.com 11-01-2022 (Dili) — Tinan 2022 koñesidu ho tinan polítika, iha ne’ebé Timor-Leste sei hasoru festa demokrasia eleisaun prezidensiál atu hili Prezidente Repúblika (PR) foun hodi lidera nasaun ne’e durante periodo tinan 5 tamba mandatu atual Presidente Francisco Guterres Lú-olo sei termina iha loron 20 Maiu 2022.
Estudante universitáriu sira, hakarak PR foun ne’ebé sei eleitu liu husi eleisaun prezidensiál atu tau a’as liu interese nasionál ka interese povu nian, duké interese grupu ka privadu nune’e bele lori nasaun lao ba oin ho diak liu tan.
Frederico da Costa de Oliveira, Estudante Universidade Nasionál Timor Lorosa’e (UNTL), husi Fakuldade Siénsia Sosiais, Departamentu Administrasaun Públika konsiente katak, presiza Xefe Estadu ne’ebé tane aas interese nasionál, laran no umilde atu hakuak povu tomak.
“Tuir ha’u-nia prespetiva nu’udar estudante ida, presiza Prezidente ida-ne’ebé di’ak liu ne’e mak Prezidente ida-ne’ebé tenki tane aas interese nasionál, prudente, umildade inklui bele hakuak nia sidadaun tomak,” dehan Estudante Frederico da Costa, bá Smnewstl iha Kampus Antigu vila-verde, Dili, segunda ne’e.
Frederico mós husu PR foun atu tau prioridade bá setór edukasaun iha Timor-Leste, tanba edukasaun mak pilar essensiál tebes no xave bá dezenvolvimentu rekursu umanu no dezenvolvimentu nasionál nasaun nian.
Nune’e mós, Estudante Universidade Dili (UNDIL), Mariana Caero da Silva hateten, iha eleisaun prezidensiál ne’e, povu presiza haree Xefe Estadu ne’ebé tane aas interese nasionál, tanba lideransa barak mak tau interese pessoál barak liu duké interese povu nian.
“Entaun ita povu mós tenki aproveita akompaña situasaun no mós akompaña situasuan saúde de’it mak akontese iha Timor-Leste, entaun ida-ne’e bele halo ita atu bele hili lideransa ne’ebé mak di’ak no lideransa ne’ebé mak tau duni interese nasionál atu bele hadi’a dezenvolvimentu ekonomia Timor-Leste,” dehan Mariana Caero.
Sorin seluk, estudante UNTL, Cesarina Soares reforsa, Prezidente Repúblika eleitu husi povu liu husi eleisaun, tenki tau mós atensaun bá ema ho difisiensia, nune’e bele hasa’e kualidade edukasaun liu-liu bá ema ho difisiensia.
“Maske sira iha limitasaun fízika, maibé, sira iha direitu hanesan ho ema ne’ebé mak la ho difisiensia,” dehan Cesarina Soares. Nia mós husu Xefe Estadu foun atu bele halo mudansa bá dezenvolvimentu Timor-Leste, nune’e lori ben estar bá povu.
Entretantu, Xefe Estadu, Francisco Guterres Lú-olo, konvida ona líder partidu polítiku ne’ebé iha asentu parlamentár 8 hanesan, Partidu FRETILIN, CNRT, PLP, KHUNTO, PD, Frente Mudansa, PUDD no UDT hodi rona sira-nia hanoin, molok dekreta kalendáriu bá eleisaun prezidensiál nian.
Tuir planu, Prezidente Repúblika, sei dekreta data eleisaun prezidensiál iha loron 15 fulan Janeiru 2022 ne’e. (ant)
Komentariu