Smnewstl.com 28-09-2021 (Dili) – Primeiru-Ministru (PM), Taur Matan Ruak deklara, tuir relatóriu monitorizasaun husi inspesaun jerál estadu katak, vasina ne’ebé aat la’ós kauza husi ahi eletrisidade mak mate, maibé laiha kontrolu husi profisionál saúde responsável sira iha frizer (cool room).
“Tanba saida mak vasina sira aat.? Ohin ita ko’alia eletrisidade, mais la’ós eletrisidade, neglijénsia, tanba ha’u haruka inspesaun jerál halo inspesaun bá Guidu Valadares nian konkluzaun mak ne’e, laiha ema ké tau matan lor-loron bá iha frizer,” dehan PM Taur, iha debate renovasaun estadu emerjénsia bá dala-18 iha plenária Parlamentu Nasionál (PN). Tersa ohin.
Aimoruk vasina iha munisípiu Covalima mós, tuir relatóriu husi Ministra Saúde nian katak, vasina aat mós la’ós kauza husi ahi eletrisidade mak mate, maibé menus kontrolu husi dader, meudia no kalan husi pessoál responsável saúde sira.
Tanba ne’e, Xefe Governu afirma, difinisaun husi vasina sira-ne’e bainhira profisionál sira la tau atensaun maka iha rísku boot bá nia atu aat hotu.
“Ami alerta par ké profisionais sira liu-liu toma konta ita-nia sistema firzer sira par ké tau atensaun ida-ne’e, labele haluha tiha semana ida mosu mai naturalmente, tanba sira iha jeradór reforsu, kuandu sentrál mate, automátikamente sira tenki tau ida-ne’e funsionamentu,” tenik nia.
PM Taur afirma tan katak, sé problema neglijénsia ita tenki haree medidas atu aplika bá responsável sira-ne’ebé sira la tau atensaun bá sira-nia servisu.
Nune’e mós, Ministra Saúde MS, Odete Maria Freitas Belo reforsa, vasina balun sei expire iha fulan outubru ho novembru, tanba ne’e ministériu saúde iha ona planu atu hahú halo vasina tama sai uma ne’ebé sei hahú husi munisípiu Dili.
“Vasina ne’ebé sei expire iha fulan outubru ho novembru. Loos duni katak, iha vasina ne’ebé mak atu expire iha fulan outubru no novembru, tanba ita mai fasilidade saúde sira. Agora dadauk ita atu lori vasina la’o tuir uma-uma, ne’e hala’o ona iha Dili, hala’o mós iha Baucau, ami espera katak, iha munisípiu seluk mós tenki lori vasina la’o tuir ita-nia komunidade sira,” dehan Odete.(ant)
Komentariu