Smnewstl.com 21-09-2021 (Dili) – Hafoin simu alerta husi meteorolojia Austrália no meteorolojia husi nasoens unidas, Sekretáriu Estadu Protesaun Sivíl (SEPS) intensifika kedas nível alerta bá komunidade ne’ebé mak hela iha área rísku bá dezastre.
Sekretáriu Estadu Protesaun Sivíl, Joaquim Gusmãi Reis Martins informa, Timor-Leste hetan alerta husi meteorolojia Austrália no mós meteorolojia internasionál husi nasoens unidas katak, posibilidade sei akontese tan laniña iha Timor.
Joquim Gusmão esplika, laniña katak, udan ne’ebé boot intensidade normál iha tinan 2021 to’o tinan oin 2022.
“Ita mós komesa halo sosializasaun bá ita-nia fatin sira-ne’ebé mak ita identifika hanesan fatin rísku bá dezastre hanesan, mota ninin, foho lolon, ita fó nafatin hanoin bá sira. Ita mós komesa atu halo aproximasaun bá fatin sira-ne’ebé mak ita identifika bele sai hanesan sentru evakuasaun karik akontese dezastre,” dehan Sekretáriu Eatadu, Joaquim Gusmão, iha rezidénsia PM Farol, Dili. Tersa ohin.
Governante ne’e akresenta, aprende ho dezastre naturál ne’ebé akontese iha dia 4 abríl liu bá, maka SEPS konvoka ona enkontru preparativus ho parseiru internasionál no ajénsia espesializadas sira husi nasoens unidas, nune’e bainhira kalamidade mosu, ekipa bele halo kedas intervensaun.
SEPS mós sei kordena ho Ministériu Transporte Komunikasaun, atu servisu hamutuho operadór telekomunikasaun tolu Timor Telecom, Telkomcel no Telemor, iinklui diresaun nasionál meteorolojia no jeofízika hodi hasai menjasan alerta bá popupasaun sira.
“Preparasaun mak hanesan ohin ha’u dehan ne’e, sosializasaun bá ita-nia komunidade sira liu-liu sira-ne’ebé mak iha fatin rísku dezastre par bele atensaun, ita mós sei ko’alia ho ministériu transporte komunikasaun par hodi bele servisu besik liután, ho meteorolojia, konvida mós ita-nia parseiru operadór telekomunikasaun tolu ne’e hodi bele fó SMS alerta sai beibeik bá komunidade hodi bele alerta ho situasaun ne’e,” dehan nia.
Maski nune’e, Governante ne’e hatutan, governu mós prevé ona orsamentu balun iha fundu rezerva kontinjénsia, nune’e bainhira akontese dezastre naturál, governu bele utiliza osan refere hodi apoiu vítima sira.
Oras ne’e dadauk, SEPS mós prepara hela atu halo restocking hahán no mós la’ós hahán bá munisípiu sira, tanba hanesan baibain restocking ne’ebé SEPS prepara hamutuk pakote 50, nune’e bele fó apoiu bá vítima sira ho lalais.(ant)
Komentariu