Smnewstl.com 01-09-2021 (Dili) — Diretór Jerál Sekretariadu Tékniku Administrasaun Eleitorál (STAE), Acilino Manuel Branco konfirma, durante prosesu resenseamentu eleitorál no atualizasaun baze de dadus iha postu administrativu no munisípiu sira seluk kontinua la’o hanesan baibain.
Tanba Diretór Jerál STAE dehan, konfinamentu obrigatóriu ne’e aplika de’it iha munisípiu Dili ho Ermera, enkuantu munisípiu sira seluk laiha.
“Hanesan ha’u hatete katak, atendimentu iha munisípiu sira seluk la’o hanesan baibain, tanba aplikasaun konfinamentu iha munisípiu Dili ho Ermera de’it altura ne’ebá,” dehan Diretór Jerál STAE, Acilino Manuel Branco, iha knár fatin Kaikoli, kinta ohin.
STAE mós destaka ona funsionáriu sira to’o iha munisípiu no postu administrativu sira, nune’e bele halo atendimentu bá sidadaun ne’ebé atu rejístu eleitorál foun, no mós atualiza kartaun eleitorál, tanba tinan oin 2020 tama ona iha eleisaun prezidensiál.
Ne’eduni, bainhira atividade resenseamentu eleitorál paralizadu, maka sei fó impaktu bá eleisaun sira iha futuru.
“Agora sé atividade eleitorais ne’e paradu oinsá.? Signifika ne’e bele fó impaktu bá ita-nia eleisaun, tanba ne’e mezemu iha parte ida ita aplika regra sanitáriu ho mós konfinamentu, maibé atividades eleitorál ho ita-nia koordenasaun ho autoridade iha munisípiu liu-liu ho parte seguransa administrasaun, saúde ninian, par nune’e atendimentu sira-ne’e la’o, maibé ita kumpre nafatin regras prevensaun ne’ebé mak iha,” dehan nia.
Alem de ne’e Diretór Jerál STAE ne’e informa tan katak, to’o oras ne’e, STAE seidauk bele publika dadus eleitores provizóriu, hahú husi fulan Juñu to’o Setembru nian, tanba regularmente fulan tolu mak prodús dala ida nia rezulta.
“Ninia rezultadu ne’e sei nafatin, tanba ita prodús ne’e regularmente fulan tolu dala ida, ida-ne’ebé mak horbainhira ita fó sai ne’e to’o fim de Juñu, ne’ebé ida ikus ne’e tékniku sira sei sinkroniza hela, tanba atendimentu ne’e ita la’o postu, munisípiu depois dadus ne’e mai iha servidór STAE nasionál nian, depois sei prodús ninia rezultadu, ne’ebé semana ida tan hanesan ne’e ita foin fó sai fali ninia rezultadu provizóriu ninian,” dehan nia.
Tanba ne’e, rezultadu ne’ebé agora iha hela ne’e mak kontinua dadus anteriór ne’ebé publika ona hamutuk eleitores 840.300 resin mak sei nafatin hela provizóriu.
Entretantu, iha dekretu governu kona-ba konfinamentu domisiliáriu jerál iha munisípiu Dili ne’e mós, permite sidadaun sira-ne’ebé presiza atu bá halo sira-nia kartaun eleitorál no troka kartaun eleitorál.
Prosesu resenseamentu eleitorál no atualizasaun baze de dadus ne’e sei remata iha iha loron 15 fulan Janeiru tinan 2022.(ant)
Komentariu