Smnewstl.com — Governu liu husi reuniaun konsellu ministru, aprova projetu deliberasaun kona-ba planu dezenvolvimentu bá portu Dili. Bá futuru, ezekutivu iha planu atu transforma Portu Dili sai zona turístika bá ró kruzeiru.
Proposta ne’e aprezenta husi Ministru Transporte Komunikasaun (MTK), José Agostinho da Silva, tanba planu ne’e prevé atu halo reestruturasaun no modernizasaun bá Portu Dili, hafoin transfere funsaun bá Portu karta bá Portu foun Tibar.
Ministru Prezidénsia Konsellu Ministru, Fidélis Magalhães afirma, governu aprova ok planu dezenvolvimentu bá portu Dili, nune’e bainhira konstrusaun Portu Baya Tibar remata, bele governu bele dezenvolve fali postu Dili sai zona turístika bá mariña ida no portu kruzeiru sira-nian.
“Wainhira Portu Tibar hotu, ita sei iha portu Dili ponte kais, agora ponte kais ne’e enves de ita so’e de’it husik halo mamuk deit, saida mak governu ohin aprova ne’e katak, sei iha planu dezenvolvimentu ida atu halo sai zona turístika ida, no mós bele sai kais ida bá ró sira ho karákter sira hanesan turizmu nian, la’ós ró komersiál sira ne’ebé mak lori kontentor,” dehan Ministru Fidélis Magalhães, kuarta (28/07/21) hafoin remata enkontru konsellu ministru iha Palásiu Governu.
“Planu dezenvolvimentu ne’e mós planu ida-ne’ebé mak Ministru Transporte Komunikasaun hato’o, ne’ebé sei dezenvolve hotu komponente ida, planu ne’e hanaran opsaun prémiu husi projetu ne’e, ne’ebé prátikamente sei dezenvolve husi tasi ibun embaixada Portugál nian bá to’o Motael nian, depois iha instalasaun oi-oin ne’ebé sei inklui iha laran,” hatutan nia.
Portu Dili ne’e mós, bá futuru, prevé katak, investimentu iha projetu atu garante retornu boot no iha aumentu turizmu no mós investimentu privadu, nune’e bele dezenvolve negósiu hodi kria servisu bá sidadaun sira.
“Ne’e projetu boot ida-ne’ebé hanesan prioridade ida husi Primeiru-Ministru mós hanesan sinál ida katak, enves de ita ko’alia de’it kona-ba diversifikasaun ita-nia ekonomia, maibé ita mós, maibé ita mós foti pasu ida ho investimentu sira hanesan ne’e par bele dudu hanesan motor bá dezenvolvimentu turizmu setór la’ós minarai,” tenik nia.
Progressu konstrusaun bá Portu Baya Tibar, atínji ona 40%, no iha parte kais nian atínji ona 50% resin, tanba ne’e projetu refere tuir planu, sei finaliza iha loron 20 fulan-Maiu tinan 2022.(ant)
Komentariu