Smnewstl.com — Provedoria Diretius Umanus no Justisa (PDHJ), husu governu ho Parlamentu Nasionál (PN) atu aselera ratifikasaun konvensaun internasionál bá direitu ema ho difisiensia.
Kestaun ne’e, Provedora PDHJ, Jesuina Maria Ferreira Gomes, aprezenta ona bá Primeiru-Ministru (PM), Taur Matan Ruak, hato’o hafoin entrega relatóriu annual PDHJ bá tinan 2020.
“Ami mai marka audiénsia ho Primeiru-Ministru liu-liu atu partilla PDHJ nia relatóriu annual 2020 nian ne’ebé entrega ona bá Parlamentu Nasionál iha fulan-Juñu, i partilla mós kópia ida ho Primeiru-Ministru, tanba iha relatóriu annual ne’e, iha mós rekomendasaun lubun ida bá governu Timor-Leste hanesan rekomendasaun par governu bele aselera prosesu ratifikasaun konvensaun internasionál bá direitu ema ho difisiensia nian,” dehan Provedora PDHJ, Jesuina Gomes kuarta (21/07/21) iha rezidénsia Xefe Governu Farol, Dili.
Jesuina Gomes afirma, atu halo ratifikasaun bá konvensaun internasionál ne’e, ezekutivu liu husi ministériu justisa mak tenki halo preparasaun, nune’e Parlamentu Nasionál bele ratifika.
“Ne’ebé sé governu bele aselera prosesu ne’e, entaun Parlamentu Nasionál bele ratifika konvensaun internasionál direitu bá ema ho difisiensia, tanba Timor-Leste agora iha purvolta de 38.000 ita-nia maluk sira-ne’ebé ho difisiensia,” subliña Jesuina.
Maske nune’e Provedora PDHJ ne’e akresenta, konvensaun internasionál bá direitu ema ho difisiensia ne’e importante tebes bá estadu Timor-Leste atu ratifika ho lalais.(ant)
Komentariu