Smnewstl.com| Lolotoe, 2 Novembru 2026 — Amo Paróku Nossa Senhora de Fátima Lolotoe, Padre José Herman, afirma katak rate la’ós destinu finál ne’ebé define istória umana tomak, maibé fatin ida atu halibur memória sira ho esperansa, fiar no orasaun ba matebian sira.
Deklarasaun ne’e hato’o Padre José Herman iha nia homilia durante selebrasaun Missa Komemorasaun Klamar Fiar-Na’in Hotu nian, iha Igreja Paróquia Nossa Senhora de Fátima Lolotoe, Munisípiu Bobonaro, iha loron Segunda-feira, 2 Novembru 2026.
Padre Herman esplika katak Kreda Katólika konvida fiar-na’in sira atu hanoin no reza ba família, belun no ema hotu ne’ebé mate ona, liuliu sira ne’ebé uluk sai parte importante iha ita-nia moris. Maski sira la hamutuk ona ho ita iha mundu ne’e, fiar no esperansa iha Maromak nia domin no mizerikórdia tenke kontinua sai fonte konsolasaun ba sira ne’ebé hela.
“Rate la’ós fatin atu sai sentru dezesperu nian. Iha ne’ebá, ita rekoñese realidade separasaun nian, maibé ita entrega matebian sira ba Maromak, hodi husu Nia atu perdua sira-nia sala no simu sira iha Nia dame,” dehan Padre Herman.
Nia hatutan katak, bainhira ema ne’ebé ita hadomi mate, ita bele sente triste, lakon no arrepende tanba iha buat barak ne’ebé ita seidauk konsege halo ka dehan ba sira. Maibé, tempu kontinua lao, no ita labele hela nafatin iha tristeza no nakukun nia laran.
Tuir Padre Herman, komemorasaun loron matebian nian la’ós atu aumenta tristeza, maibé atu hanoin fali sira ne’ebé liu ona ho fiar metin nu’udar sarani Katólika, liuhusi Kristu nia Paixaun, mate no moris-hi’as.
Ema loos nia klamar iha Maromak nia liman
Iha nia homilia, Padre Herman refere mós ba mensajen husi Leitura Dahuluk katak ema loos nia klamar iha Maromak nia liman. Nia afirma katak, maski iha ema nia matan mate bele haree hanesan rohan ba buat hotu, fiar-na’in sira tenke haree realidade ne’e ho matan fiar nian.
“Buat ne’ebé lakon hosi ema nia matan la signifika katak lakon duni. Maromak nafatin iha Nia liman atu simu, proteje no fó domin rohan-laek ba sira. Bainhira ita labele tan kaer ema ne’ebé ita hadomi nia liman, ita bele entrega sira ba Maromak, ne’ebé hatene ema ida-idak ho perfeitu,” nia afirma.
Padre Herman esplika katak esperansa sarani la’ós de’it hakarak atu buat hotu remata ho di’ak, maibé fiar ne’ebé iha abut iha Jezús Kristu. Kristu mate ba mundu nia sala-na’in sira, hodi rekonsilia umanidade ho Aman Maromak no moris-hi’as atu loke dalan ba moris foun.
Tanba ne’e, nia konvida fiar-na’in sira atu la’ós de’it hanoin matebian sira-nia memória, maibé entrega sira ba Maromak nia mizerikórdia, ho haraik-an no fiar, sein asume ka julga destinu finál klamar ida-idak nian.
Orasaun ba matebian la limita ba família rasik
Padre Herman husu mós ba fiar-na’in sira atu komprende tanba sá Kreda Katólika kontinua halo orasaun ba matebian sira. Tuir nia, hahalok ne’e bazeia ba fiar iha komuñaun santu sira-nian, ne’ebé hatudu katak domin no orasaun Kreda nian la limita de’it ba sira ne’ebé sei moris iha mundu.
Nia subliña katak orasaun, liuliu selebrasaun Eukaristia, sai dalan ida atu entrega matebian sira ba Maromak nia mizerikórdia. Kreda mós hanorin kona-ba purgatóriu, hanesan purifikasaun ba klamar sira ne’ebé mate iha Maromak nia grasa no amizade, maibé presiza purifikasaun molok tama iha ksolok lalehan nian.
Nune’e, Padre Herman konvida fiar-na’in sira atu estende sira-nia orasaun ba ema hotu ne’ebé mate ona, inklui sira ne’ebé mate mesak, vítima funu no dezastre, sira ne’ebé lakon família, no sira ne’ebé la iha ema atu vizita sira-nia rate ka reza ba sira.
Maski ita la hatene sira-nia naran ka istória moris, ema ida-idak iha folin boot iha Maromak nia matan. Tanba ne’e, orasaun sarani nian tenke habelar liu família no belun sira rasik.
Vizita rate tenke akompaña ho orasaun no hahalok domin nian
Padre Herman hateten katak hamoos rate, tau ai-funan no sunu lilin mak kustume ne’ebé importante ba família Katólika sira iha komemorasaun loron matebian nian. Maibé, nia hanorin katak signifikadu vizita rate nian sei kle’an liután bainhira akompaña ho orasaun.
Fi ar-na’in sira bele reza Ami Aman, Ave Maria, ka orasaun ba matebian sira, no mós hato’o sira-nia intensaun ho liafuan rasik. Liuhusi orasaun, sira bele agradese ba Maromak ba di’ak hotu ne’ebé simu liuhusi ema sira ne’ebé mate ona.
“Buka tempu ohin atu hanoin ema ida ne’ebé mate ona. Hanoin nia oin, buat di’ak sira ne’ebé nia halo, no lisaun sira ne’ebé ita simu hosi nia moris. Depois, entrega nia ba Maromak iha orasaun,” haktuir Padre Herman.
Nia enkoraja mós fiar-na’in sira atu transforma memória ba hahalok konkretu iha moris loroloron, hanesan ajuda ema ne’ebé presiza, husu deskulpa ba ema ne’ebé ita hakanek, rekonsilia ho ema ne’ebé iha konflitu, no hametin relasaun ho família no komunidade.
Tuir nia, maneira ida atu fó onra ba ema ne’ebé mate ona la’ós de’it hanoin sira-nia naran, maibé kontinua halo buat di’ak sira ne’ebé sira rasik hanorin no hatudu durante sira-nia moris.
Komemorasaun matebian sai oportunidade atu hametin fiar
Iha konkluzaun homilia, Padre Herman konvida fiar-na’in sira atu dedika pelumenus minutu 10 to’o 15 hodi reza ba klamar sira ne’ebé mate ona, liuliu membru família no belun sira ne’ebé sei hela iha memória.
Nia husu atu temi sira-nia naran iha orasaun, husu Maromak nia perdaun no mizerikórdia, no entrega sira ho fiar tomak ba Nia. Nia mós enkoraja atu la haluha reza ba klamar sira ne’ebé ema seluk la hanoin ka la reza ba.
Aleinde orasaun, nia konvida fiar-na’in sira atu halo asaun domin ida molok loron remata, hanesan kontaktu família ne’ebé kleur ona la ko’alia, hadi’a relasaun ne’ebé estraga, ka ajuda viziñu ne’ebé presiza apoiu.
Padre Herman afirma katak Komemorasaun Klamar Fiar-Na’in Hotu nian la’ós de’it loron atu hanoin sira ne’ebé liu ona, maibé mós oportunidade atu buras iha fiar, aprende atu perdua ho laran-moos, no uza tempu moris nian nu’udar prezente husi Maromak.
Ho fiar iha Kristu nia moris-hi’as, fiar-na’in sira konvida atu simu tristeza tanba lakon ema ne’ebé hadomi, maibé kontinua lao ho esperansa, domin no fiar iha Maromak nia promesa kona-ba moris rohan-laek
Komentariu