Smnewstl.com Liquica 29 Outubru 2026-Forsa Konjunta Timor-Leste kaptura joven na’in rua ho inisiál JAR no MPG, hamutuk ho Coca-Cola kaixa 30, ne’ebé suspeita tama ilegalmente husi Indonézia, la tuir prosedimentu aduaneiru.
Apreensaun ne’e akontese iha oras 06h00 dadeer, durante operasaun auto-stop ba veíkulu transporte públiku no privadu, iha área Maubara, Suku Vaviquina, Postu Administrativu Maubara, Munisípiu Liquiçá, iha loron 29 Outubru 2026.
Durante operasaun, ekipa konjunta detekta Coca-Cola kaixa 30 ne’ebé transporta ho veíkulu marka Honda Fit, ho númeru matríkula B.29.755 TL. Veíkulu ne’e mai husi Munisípiu Bobonaro ho destinasaun ba Sidade Dili.
Ekipa konjunta suspeita katak bebida asukarada ne’e tama iha territóriu Timor-Leste husi Indonézia, tanba suspeitu sira la aprezenta dokumentu importasaun legál.
Hafoin verifika sasán ne’e, ekipa konjunta apreende Coca-Cola kaixa 30 no entrega ba Komandu PNTL Munisípiu Liquiçá, hamutuk ho joven na’in rua, atu kontinua prosesu investigasaun.
Kazu ne’e rejista ho númeru NUC 0058/26.LIMBR, atu autoridade kompetente sira bele hala’o investigasaun no foti desizaun tuir lei ne’ebé vigora iha Timor-Leste.
Operasaun ne’e lidera husi Autoridade Aduaneira (AA), ho partisipasaun husi Diresaun Servisu Investigasaun Kriminál (DSIK), Diresaun Servisu Informasaun Polísia (DSIP), Polísia Nasionál Timor-Leste (PNTL), Polísia Sientífika Investigasaun Kriminál (PCIC), Servisu Nasionál Intelijénsia Estratéjiku (SNIE), membru D2 husi FALINTIL–Forsa Defeza Timor-Leste (F-FDTL) no S2 husi Unidade FALINTIL.
Forsa Konjunta Timor-Leste kontinua hametin koordenasaun no hala’o operasaun fiskalizasaun iha área fronteira no fatin estratéjiku sira, ho objetivu atu prevene no kombate atividade kontra-bandu, no asegura kumprimentu ba lei no regulamentu aduaneiru.
Suspeitu sira sei hetan tratamentu tuir prosedimentu legál, ho respeitu ba prinsipiu prezunsaun inosénsia.
Komentariu