ASEAN 2029: Governu Aprova Rejime Espesial ba Reabilitasaun Sidade Dili.

Smnews.com | Dili, 28 Outubru 2026 — Konsellu Ministrus aprova Projetu Dekretu-Lei ne’ebé aprezenta husi Ministru Obras Públikas, Samuel Marçal, kona-ba Rejime Espesiál Aprovizionamentu ba Konstrusaun Infraestrutura, ho objetivu atu hadi’a asesibilidade no reabilitasaun Sidade Dili iha ámbitu preparasaun ba eventu sira relasionadu ho Prezidénsia Timor-Leste ba ASEAN.

Diploma ne’e estabelese rejime espesiál ida atu simplifika prosedimentu aprovizionamentu ba ezekusaun projetu prioritáriu sira, hodi garante katak servisu sira bele remata tuir kalendáriu ne’ebé planeadu ba eventu sira relasionadu ho Prezidénsia ASEAN, ne’ebé sei hala’o iha tinan 2029.

Rejime ne’e kobre seksaun neen iha rede estrada no dalan sira iha Sidade Dili. Intervensaun sira inklui hadi’a estrada, dalan ba ema la’o-ain no espasu públiku, troka sistema eletrisidade públika ne’ebé instala iha leten ba sistema rai-okos, no instala ka prepara infraestrutura públika ba saneamentu, abastesimentu bee-moos no telekomunikasaun.

Ba ezekusaun projetu sira ne’e, diploma permite atu uza prosedimentu solisitasaun kotasaun ka ajuste diretu, la depende ba valór kontratu. Maski nune’e, prosedimentu sira tenke kumpre nafatin prinsípiu no regra seluk ne’ebé aplika ba aprovizionamentu públiku no ezekusaun despeza públika.

Implementasaun projetu sira ne’e sei kabe ba Ministériu Obras Públikas no empreza públika sira ne’ebé iha nia tutela. Komisaun Nasionál Aprovizionamentu, I.P., sei responsabiliza ba hala’o prosedimentu aprovizionamentu, enkuantu Ajénsia Dezenvolvimentu Nasionál, I.P., sei kontinua hala’o verifikasaun téknika no finanseira, tuir kompeténsia ne’ebé lejizlasaun aplikável determina.

Medida ne’e iha objetivu atu garante katak atividade sira ne’ebé nesesáriu ba preparasaun Sidade Dili bele hala’o no remata tuir tempu ba eventu sira relasionadu ho Prezidénsia Timor-Leste ba ASEAN. Aleinde prepara sidade ba eventu internasionál sira, projetu sira ne’e mós sei kontribui ba hadi’a sirkulasaun rodoviária, asesibilidade ba ema la’o-ain, espasu urbanu no infraestrutura públika iha kapital.