SMnewstl.com Díli, 27 Outubru 2026-Primeiru Ministru, Kay Rala Xanana Gusmão depozita konfiansa tomak ba profissionalizmu no dedikasaun husi empreza TIMOR GAP, E.P., hodi dezenvolve kampu Greater Sunrise, hafoin sosa partisipasaun husi empreza Woodside Energy Ltd.
Xefe Governu realiza vizita ba edifísiu TIMOR GAP, E.P., hafoin entidade estatal ne’e alkansa akordu Sale and Purchase Agreement – SPA, hodi adkiri partisipasaun husi Woodside Energy Ltd ho porsentu 33.44, inklui títilu ne’ebé konteín iha Greater Sunrise no sai na’in ba Greater Sunrise.
Pozisaun ne’ebé rezulta alkansu Sale and Purchase Agreement – SPA mak kompromissu TIMOR GAP, E.P., atu dudu dezenvolvimentu kampu Greater Sunrise, enkuantu Woodside Energy prefere halo jestaun ba portfóliu interna no dezenvolvimentu Greater Sunrise la’os ajenda prioritária. Pozisaun ne’e la alinea ho vizaun estratéjiku governu nian, hodi rezulta inisiasaun ba negósiu hodi entrega ba TIMOR GAP, atu dezenvolve Greater Sunrise.
Ba oin, Prezidente TIMOR GAP, E.P. garante atu kontinua esforsu ne’ebé inisia ona, hodi alkansa konseitu úniku ba dezenolvimentu Greater Sunrise mak TLNG iha Natarbora, hodi aprezenta ba Governu Timor-Leste no Austrália no Final Investment Decision – FID iha tinan 2029, hodi atinji produsaun dahuluk iha tinan 2034. Maibé, entidade estatal ne’e nafatin nakloke possibilidade ba parseria foun iha futuru, ba dezenvolvimentu kampu estratéjiku ne’e.
Komentariu