Smnewstl.com | Covalima, 31 Outubru 2026-Operasaun konjunta iha fronteira Covalima konsege apreende fugetes batang 576, mina rai no gasolina ho kuantidade total litru 465, kilat manu ida, bebida asukárada kaixa sia no motorizada rua, ne’ebé deskonfia tama ilegalmente husi nasaun viziñu Indonézia.

Apreensaun ne’e akontese iha kalan 29 Outubru 2026, tuku 22:00, iha área Kanuhasan, Aldeia Wetabak, Suku Beiseuc, Postu Administrativu Tilomar, Munisípiu Covalima.

ADVERTISEMENT
SCROLL FILA BA NOTISIA


Iha operasaun ne’e, ekipa konjunta konsege kaptura fugetes 8 Shot marka Roman Candle ho total batang 576, ne’ebé fahe iha kaixa neen, ho kada kaixa kontein fugetes batang 96.

Lee Mós:
ME Dulce de Jesus Soares Aprezenta Rezultado Ezame Nasional 2024 ba PM Molok Aninsia ba Publiku

Fugetes hirak-ne’e transporta ho motorizada rua, mak Honda Genio ho matríkula AC.6507 TL no Honda Beat ho matríkula AB.1700 TL. Maibé, bainhira ekipa konjunta hala’o operasaun, suspeitu mane na’in rua ne’ebé kondús motorizada hirak-ne’e abandona sasán no halai sai husi fatin.

Aleinde fugetes, ekipa konjunta kontinua halo operasaun iha área ne’ebé hanesan no apreende mina rai no gasolina ho kuantidade total litru 465, kilat manu marka Sarap Taiger ida no bebida asukárada marka Olala Milky Jelly kaixa sia.

Lee Mós:
Ministériu Edukasaun Deside Aprova pedidu hari’i eskola iha Aldeia Labotete Suku Goulolo Postu Administrativu Cailaco

Merkadoria hirak-ne’e deskonfia tama mai Timor-Leste husi Indonézia, la kumpre prosedimentu importasaun no regra aduaneira ne’ebé vigora. Tanba ne’e, autoridade kompetente sira halo apreensaun atu asegura sasán hirak-ne’e nu’udar evidénsia ba prosesu investigasaun.

Operasaun ne’e lidera hosi Autoridade Aduaneira (AA), ho partisipasaun Diresaun Servisu Investigasaun Kriminál (DSIK), Diresaun Servisu Informasaun Polísia (DSIP) husi PNTL, PCIC, SNIE, membru D2 husi F-FDTL no S2 husi Unidade FALINTIL, ho apoiu hosi Unidade Patruillamentu Fronteira (UPF) iha fronteira Mota Masin.

Hafoin apreensaun, ekipa konjunta lori evidénsia hirak-ne’e ba Autoridade Aduaneira iha Munisípiu Covalima atu halo verifikasaun. Iha loron 30 Outubru 2026, tuku 12:10 OTL, ekipa entrega diretamente evidénsia hirak-ne’e ba Ministériu Públiku atu kontinua prosesu tuir lei.

Lee Mós:
Ministra Dulce Lansa Ofisial Bolsa Kandidatu ba Manorin Faze Daruak Iha Manatuto

Kazu ne’e rejista ona iha Ministériu Públiku iha loron 30 Outubru 2026, tuku 12:22 OTL, ho númeru NUC: 397.PRPIC.26.

Operasaun ne’e halo parte husi esforsu instituisaun kompetente sira atu kombate atividade kontra-bandu, kontrola movimentu merkadoria iha fronteira no asegura kumprimentu ba lei aduaneira iha Timor-Leste.

 

Lee nain: 4