Smnewstl.com, Dili, 22 Outubru 2026 — Polísia Nasionál Timor-Leste (PNTL) prepara operasaun seguransa atu garante orden públika durante selebrasaun Loron Finadu no realizasaun Festival Fronteira iha Munisípiu Lautém, hodi responde ba movimentu sidadaun no atividade importante sira ne’ebé hala’o iha períodu ne’e.
Komandante Komandu Operasaun PNTL, Komisáriu Asistente Polísia Armando Monteiro, hato’o informasaun ne’e iha Kuartél-Jerál PNTL, Kaikoli, Dili, no esplika katak planeamentu operasionál prepara ona, ho fahe responsabilidade ba komandu munisipál sira atu garante seguransa iha sira-nia área jurisdisaun.
Tuir Komandante Armando Monteiro katak,operasaun ne’e foka atu garante seguransa ba sidadaun sira ne’ebé viajem husi kapitál ba munisípiu sira atu halo orasaun no vizita família durante Loron Finadu, inklui sira-nia viajen fila-fali ba Dili.
Aleinde ne’e, PNTL mós fó atensaun ba eventu importante sira ne’ebé hala’o iha tempu hanesan, inklui Festival Fronteira iha Lautém no vizita ofisiál husi Ministru Defeza no Vise-Primeiru-Ministru Austrália ba Timor-Leste.
Atu garante operasaun lao ho di’ak, PNTL sei mobiliza unidade operasionál, unidade fronteira, Polísia Marítima, unidade espesiál no direksaun relevante sira, hodi apoia seguransa ba movimentu komunidade no atividade públika sira.
Festival Fronteira iha Lautém sei hala’o husi 23 to’o 26 Outubru 2026, ho partisipasaun husi autoridade munisipál, membru Governu, instituisaun relevante no komunidade sira, inklui partisipante husi Nusa Tenggara Timur (NTT), Indonézia.
Komandu Operasaun PNTL informa katak,Komandu Munisipál Lautém sei kontinua asume responsabilidade ba seguransa durante festival, enkuantu Komandu Operasaun sei akompaña atividade nasionál seluk, inklui serimónia iha Jardim dos Heróis, Metinaro.
Planeamentu ne’e prepara atu responde ba risku sira ne’ebé bele mosu durante movimentu sidadaun no realizasaun eventu sira, hodi prevene problema seguransa no mantein orden públika.
PNTL mós apela ba komunidade no mídia atu koopera ho autoridade sira, tuir instrusaun seguransa no kontribui ba realizasaun Loron Finadu no Festival Fronteira ne’ebé seguru no ordenadu.
PNTL reafirma kompromisu atu hala’o knaar tuir lei no kompeténsia ne’ebé atribui ba instituisaun, no responsabiliza ema ne’ebé viola lei, la haree ba estatutu ka pozisaun.(#Smnews/)
Komentariu