SMNewstl.com, Lautém, 22 Outubru 2026 — Festival Fronteira iha Munisípiu Lautém la’ós de’it sai nu’udar espasu atu promove arte no kultura, maibé mós plataforma importante ida atu hametin ekonomia azul, promove diálogu entre juventude no haforsa kooperasaun entre komunidade fronteira marítima Timor-Leste no Indonézia.
Sekretáriu Estadu Arte no Kultura (SEAK), Jorge Soares Cristóvão, afirma katak festival ne’e iha objetivu atu aproxima komunidade sira, liuliu juventude husi Timor-Leste no Nusa Tenggara Timur (NTT), Indonézia, ne’ebé iha ligasaun istórika, kultura no família.
Tuir Jorge Soares Cristóvão hateten katak liuhusi atividade kultura, organizadór sira hakarak simu no fó boas-vindas ba konvidadu sira husi NTT no Dili atu hamutuk partisipa iha festival ne’e, hodi promove amizade, komprensaun mútua no kooperasaun entre komunidade rua.
SEAK esplika katak,Festival Fronteira la limita de’it ba aprezentasaun arte no kultura, maibé mós fó atensaun ba importánsia ekonomia azul no papél Gabinete Fronteira Marítima nian, atu promove dezenvolvimentu iha área fronteira marítima.
Tuir Governante ne’e katak, seleksaun Lospalos nu’udar fatin ba festival ne’e iha relasaun ho importánsia fronteira marítima, ne’ebé presiza hetan atensaun liuhusi diálogu, kooperasaun no atividade ne’ebé envolve komunidade sira.
SEAK Jorge Soares Cristóvão mós informa katak iha loron tuirmai, sei hala’o semináriu ida ho partisipasaun Primeiru-Ministru nu’udar oradór prinsipál, atu fó oportunidade ba partisipante sira atu diskute asuntu relevante sira kona-ba dezenvolvimentu no kooperasaun.
Sekretario Estadu Jorge Soares Cristóvão subliña katak, juventude husi Timor-Leste no Indonézia, liuliu sira ne’ebé iha ligasaun família no kultura, bele sai ponte importante ida atu hametin relasaun entre jerasaun foun husi komunidade rua.
Liuhusi aprezentasaun grupu arte, atividade kultura no partilha koñesimentu tradisionál, festival ne’e mós buka hametin interasaun entre jovem sira husi Munisípiu Lautém no Indonézia, hodi haburas dame no estabilidade iha área fronteira.
Iha parte seluk, Prezidente Autoridade Munisípiu Lautém, Melio de Jesus, destaca katak kultura iha papél importante iha prosesu rezolusaun problema entre komunidade, tanba desde tempu uluk, komunidade sira uza prátika tradisionál nu’udar dalan atu rezolve diferensa no hametin relasaun.
PAM Lautém hato’o apresiasaun ba inisiativa SEAK no instituisaun sira ne’ebé envolve, inklui CNC, tanba uza kultura nu’udar instrumentu ida atu aproxima komunidade no promove kooperasaun.
Tuir Prezidente Melio de Jesus mós hato’o esperansa katak Festival Fronteira bele fó impaktu pozitivu ba dezenvolvimentu nasionál, liuhusi valorizasaun kultura, hametin relasaun entre komunidade no haburas espíritu kooperasaun entre Timor-Leste no Indonézia.(#Smnews/)
Komentariu