Smnewstl.com, Dili, 22 Outubru 2026 — Repúblika Populár Xina aplika tarifa zero ba produtu hosi Timor-Leste, ne’ebé bele loke oportunidade foun ba prodútór, emprezáriu no setór privadu nasionál atu asesu ba merkadu internasionál no aumenta esportasaun produtu lokál.
Ministru Komérsiu no Indústria, Filipus Nino Pereira, hateten katak, oportunidade ne’e sai hanesan vantajen importante ba Timor-Leste atu promove produtu nasionál no hametin relasaun komersiál ho Xina.
Deklarasaun ne’e halo hafoin Ministériu Komérsiu no Indústria (MCI) hala’o enkontru kortézia no reuniaun bilaterál ho Vise-Ministru Komérsiu Repúblika Populár Xina, Yang Dong, iha salaun reuniaun MCI, Bebora, Dili, hodi diskute kona-ba hametin kooperasaun ekonómika no komersiál entre nasaun rua.
Tuir Ministru Nino Pereira esplika katak,maski produtu Timor-Leste balu tama ona ba merkadu Xina, sei iha dezafiu ne’ebé presiza rezolve, liuliu kumprimentu ba regulamentu alfándega no prosesu sertifikasaun, atu garante produtu lokál bele asesu ba merkadu ne’e.
Tanba ne’e, nia husu Governu no setór privadu, inklui mikro, ki’ik no média empreza sira, atu aproveita oportunidade ne’ebé eziste hodi hasa’e kapasidade produsaun, hadi’a kualidade produtu no aumenta kompetitividade iha merkadu internasionál.
Ministru ne’e mós temi katak Timor-Leste partisipa ona iha eventu komersiál internasionál, inklui China-ASEAN Expo, ne’ebé fó oportunidade ba emprezáriu no komersiantes Timor-Leste nian atu promove produtu lokál no estabelese ligasaun komersiál ho emprezáriu hosi Xina.
Tuir Governante Nino Pereira, partisipasaun iha eventu sira ne’e bele ajuda atrai investimentu, diversifika ekonomia nasionál no hametin kooperasaun entre setór privadu hosi nasaun rua
Aleinde komérsiu no investimentu, Timor-Leste no Xina mós,diskute kona-ba asisténsia téknika no dezenvolvimentu kapasidade rekursu umanu, inklui formasaun ba funsionáriu sira no kooperasaun entre instituisaun governamentál relevante.
Ministro Nino Pereira propoin atu kria ekipa estudu ida hodi identifika oportunidade konkretu no transforma diskusaun bilaterál ba asaun ne’ebé bele implementa, atu dinamiza kooperasaun ekonómika no komersiál entre Timor-Leste no Xina.
Ho oportunidade tarifa zero no kooperasaun komersiál ne’ebé kontinua hametin, Governu hein katak prodútór no emprezáriu lokál sira bele aumenta asesu ba merkadu Xina, promove produtu nasionál no kontribui ba dezenvolvimentu ekonómiku sustentável iha Timor-Leste.(#Smnews/)
Komentariu