SmnewsTL.com | Ermera, 20 Outubru 2026-Dalia Dias Mouzinho, feto joven tinan 22 ne’ebé hetan kanek grave tanba hetan ta ho katana husi nia aman rasik iha Samalete, Munisípiu Ermera, ikusmai hakotu iis iha Hospital Nasionál Guido Valadares (HNGV), Dili, hafoin submete ba tratamentu médiku.
Insidente ne’e akontese iha Samalete, bainhira Dalia hetan atake husi nia aman rasik, ne’ebé suspeitu uza katana hodi ,rezulta vítima sofre kanek grave no presiza hetan asisténsia médika urjente.
Hafoin insidente, vítima transfere ba HNGV iha Dili atu hetan tratamentu tanba nia kondisaun saúde grave. Maski ekipa médika fó asisténsia, vítima ikusmai la konsege salva nia vida.
Ho vítima nia mate ne’e lori tristezas ba família no komunidade, liuliu tanba kazu ne’e envolve violénsia iha ambiente família, ne’ebé tenke sai fatin seguru ba membru família hotu-hotu.
Kazu ne’e mós hamosu preokupasaun kona-ba violénsia doméstika no nesesidade atu hametin protesaun ba feto no labarik sira, atu prevene aktu violénsia ne’ebé bele hamosu konsekuénsia grave, inklui lakon vida.
Violénsia doméstika la’ós de’it problema família nian, maibé mós sai asuntu importante ba seguransa no direitu umanu. Bainhira iha konflitu iha família, presiza buka dalan rezolve liuhusi diálogu no mekanizmu legál, la’ós ho uza forsa ka arma ne’ebé bele ameasa ema seluk nia vida.
Ho insidente ne’e Autoridade kompetente hanesan Polisia Nasionál Timor-Leste kontinua halo investigasaun atu klarifika kronolojia insidente, motívu no responsabilidade legál ba kazu ne’e, molok submete ba Justisa tuir lei ne’ebé vigora.(Smnews/)
Komentariu