SMnews.com, Dili, 20 Outubru 2026 — Primeiru-Ministru Kay Rala Xanana Gusmão hala’o enkontru ho Komandante Komandu Fronteira Marítima Austrália, Kontra-Almirante Brett Stoner, iha Palásiu Governu, Dili, hodi ko’alia kona-ba hametin parseria no kooperasaun entre Timor-Leste no Austrália, liuliu iha área seguransa fronteira marítima no kombate krimi transnasionál.
Kontra-Almirante Brett Stoner hateten katak,Timor-Leste nu’udar parseiru forte ba Austrália, ne’ebé kontinua servisu hamutuk hodi kombate atividade ilegál no krimi transnasionál.
Durante enkontru ne’e, parte rua ko’alia kona-ba rezultadu balu husi kooperasaun entre nasaun rua, inklui akordu parseria ne’ebé asina ona iha tinan 2025, no área sira ne’ebé Timor-Leste no Austrália bele kontinua servisu hamutuk iha futuru.
“Timor-Leste no Austrália hanesan nasaun marítima ne’ebé fahe fronteira marítima hamutuk. Ida-ne’e importante tebes ba nasaun rua atu kontinua halo kooperasaun no hametin parseria iha futuru,” dehan Kontra-Almirante Brett Stoner ba jornalista sira iha Palásiu Governu, hafoin enkontru ho Primeiru-Ministru Xanana Gusmão.
Brett Stoner esplika katak,kooperasaun ne’e fó atensaun liu ba jestaun fronteira marítima, tuir akordu ne’ebé asina iha tinan 2025. Kooperasaun ne’e sei kontinua dezenvolve atu kobre mós jestaun fronteira terrestre, inklui iha aeroportu no área imigrasaun.
Aleinde ne’e, nasaun rua mós ko’alia kona-ba ameasa sira ne’ebé la limita de’it ba fronteira, inklui seguransa siberétika no ameasa sira seluk ne’ebé bele afeta seguransa nasaun rua.
Kontra-Almirante Brett Stoner afirma katak,peska ilegál iha Timor-Leste sai mós nu’udar ameasa ne’ebé Governu Austrália fó atensaun ba, hanesan ho preokupasaun Governu Timor-Leste.
“Austrália no Timor-Leste kontinua kooperasaun metin hodi kombate peska ilegál iha Timor-Leste,” nia afirma.
Kontra Alimirante ne’e subliña katak atividade peska ilegál la’ós de’it ameasa ba rekursu marítimu, maibé bele mós afeta atividade ekonómika nasaun.
Tanba ne’e, kooperasaun entre Timor-Leste no Austrália sei kontinua importante atu hametin seguransa marítima no kombate atividade ilegál iha tasi.(Smnews/)
Komentariu